Toshkent shahrining Uchtepa tumanida isteʼmolga yaroqsiz sariyog‘ mahsulotlarini muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Uchtepa tumanida fuqaro N.A. va boshqalar o‘zaro til biriktirib, “Diydor” MFY hududidagi avtoturargoh garajida isteʼmolchilarning hayoti yoki sog‘lig‘i xavfsizligi talablariga javob bermaydigan 400 kg sariyog‘ mahsulotini xaridorlarga sotish maqsadida go‘yoki “A.I.” MCHJ tomonidan ishlab chiqarilganligini bildiruvchi savdo belgilarini qadoqlagan.
O‘tkazilgan tezkor tadbir davomida ushbu mahsulotlar ashyoviy dalil sifatida olingan.
Mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)