Farg‘ona va Qashqadaryo viloyatlarida qalbaki aksiz markali va isteʼmolga yaroqsiz alkogol mahsulotlari savdosi fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Marg‘ilon shahar bo‘limi tomonidan o‘tkazilgan tezkor tadbirda “Sh.B.” MCHJ rahbari F.X. spirtli ichimliklar savdo do‘konida 9 turdagi jami 495 dona qalbaki aksiz markali alkogol mahsulotlarini sotuvga qo‘yganligi aniqlanib, ushbu mahsulotlar ashyoviy dalil sifatida olingan.
Departamentning Qashqadaryo viloyat boshqarmasi tomonidan o‘tkazilgan tezkor tadbirda fuqaro G.B. noqonuniy daromad orttirish maqsadida Qamashi tumani “Sarbozor” MFY hududida jami 100 dona “Yangi Shahrisabz” nomli qalbaki aksiz markali alkogol mahsulotini fuqaro T.T.ga 1,8 mln so‘mga sotgan vaqtida ushlanib, undan 21 turdagi jami 305 dona qalbaki aksiz markali alkogol mahsulotlari ashyoviy dalil sifatida olingan.
Shu kabi departamentning Farg‘ona shahar bo‘limi tomonidan o‘tkazilgan tezkor tadbirda “A-S.” MCHJga qarashli savdo do‘koni sotuvchisi D.X. hech qanday hujjatsiz “Juravli” nomli qalbaki aksiz markali alkogol mahsulotini sotgan vaqtida ushlanib, ushbu do‘kondan 13 xil turdagi jami 230 dona alkogol mahsulotlari ashyoviy dalil sifatida olingan.
Departamentning Farg‘ona shahar bo‘limi tomonidan o‘tkazilgan tezkor tadbirda esa, “Yulduz” MFYdagi xonadonda yashovchi O.A. (muqaddam sudlangan) o‘z uyida yashirin sex tashkil etib, fuqaro A.A.ga qo‘lbola usulda tayyorlangan isteʼmolga yaroqsiz alkogol mahsulotini sotgan vaqtida ushlanib, ushbu xonadondan 69,2 litr spirt va boshqa tovar-moddiy boyliklari ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)