Samarqand shahrida qariyb 5 milliard so‘mlik isteʼmolga yaroqsiz alkogol mahsulotlarini savdoga chiqarilishining oldi olindi, deb xabar beradi Bosh prokuratura huzuridagi departament.
Ma’lum qilinishicha, departamentning Samarqand viloyat boshqarmasi tomonidan mavjud tezkor maʼlumotlarga asosan viloyat IIB JQB va bojxona boshqarmasi xodimlari hamkorligida isteʼmolga yaroqsiz alkogol mahsulotlarini muomalaga kiritilishining oldini olish borasida tezkor qidiruv tadbiri o‘tkazilgan. Tadbir davomida Toshkent viloyati Parkent tumanida faoliyat yurituvchi “B.G.” MCHJ taʼsischisi M.O. va uning sherigi SH.J. Samarqand shahri “Madadkor” MFY hududida joylashgan uyning omborxonasida hech qanday hujjatsiz 30 xil turdagi 134 597 dona umumiy bahosi 4 milliard 945 million so‘mlik alkogol mahsulotini Samarqand shahrida o‘tkazish maqsadida saqlab kelgani aniqlanib, ushbu mahsulotlar ashyoviy dalil sifatida olingan.
O‘tkazilgan ekspertiza xulosalariga ko‘ra, ushbu alkogol mahsulotlarining aksiz markalari qalbakiligi hamda isteʼmolga yaroqsiz ekani aniqlangan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi.
Izoh (0)