Andijon va Farg‘ona viloyatlarida isteʼmolga yaroqsiz alkogol va aksiz markasiz tamaki mahsulotlari savdosi fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Ulug‘nor va Marhamat tumani bo‘limlari tomonidan IIB xodimlari bilan hamkorlikda o‘tkazilgan tezkor tadbirlarda “A.G.” hamda “M.O.” MCHJlarga tegishli spirtli ichimliklar savdo do‘konlarida tegishli hujjatlari bo‘lmagan umumiy bahosi 85,3 mln so‘mlik turli nomdagi 1 121 dona isteʼmolga yaroqsiz alkogol va 3 152 quti tamaki mahsulotlari savdoga qo‘yilganligi aniqlanib, ushbu mahsulotlar ashyoviy dalil sifatida olingan.
Shu kabi, Marg‘ilon shahrida o‘tkazilgan tezkor tadbirda “M.S.” MCHJga qarashli savdo do‘konida tegishli hujjatlari bo‘lmagan hamda qalbaki aksiz markali jami 263 dona alkogol mahsulotlari savdoga qo‘yilganligi aniqlanib, ushbu mahsulotlar ashyoviy dalil sifatida olingan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)