Sirdaryo viloyati Guliston shahrida isteʼmolga yaroqsiz 200 kg mol go‘shtini sotmoqchi bo‘lgan shaxs ushlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, holat Bosh prokuratura huzuridagi Departamentning Guliston tuman bo‘limi tomonidan IIB va veterinariya va chorvachilikni rivojlantirish bo‘limi xodimlari bilan hamkorlikda o‘tkazilgan tezkor tadbirda aniqlangan.
Fuqaro A.N. inson sog‘lig‘i xavfsizligi talablariga javob bermaydigan 200 kg mol go‘shtini fuqaro J.R.ga 9 million so‘mga sotishga kelishib, shundan 118 kg go‘shtni Nexia rusumli avtomobilida Guliston shahridagi “Yangi bozor” avtoturargohiga olib kelib bergan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)