Samarqandda isteʼmolga yaroqsiz yog‘ ishlab chiqarayotgan yashirin sexlar aniqlandi

Samarqandda isteʼmolga yaroqsiz yog‘ mahsulotlari ishlab chiqarayotgan sexlar aniqlandi, deb xabar beradi Bosh prokuratura huzuridagi departament.

Qayd etilishicha, departamentning Payariq, Oqdaryo va Kitob tumani bo‘limlari tomonidan IIB xodimlari bilan hamkorlikda tezkor tadbirlar o‘tkazilgan. Tadbirlar davomida “Paxtaobod” va “Primkent” MFYda yashovchi fuqarolar R.Sh., A.R. o‘z uyining yordamchi xo‘jaligida yashirin sex tashkil etib, isteʼmolchilarning hayoti va sog‘lig‘i xavfsizligi talablariga javob bermaydigan yog‘ mahsuloti ishlab chiqarayotgani aniqlangan.

Ushbu sexlardan jami 263 litr qo‘lbola yog‘, 68 kilogramm chigit va boshqa tovar-moddiy boyliklari ashyoviy dalil sifatida olingan.

Mazkur holatlar yuzasidan Jinoyat kodeksining 186-2-moddasi (chigitdan olinadigan mahsulotni qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.

• Surxondaryoda ham iyun oyida iste’molga yaroqsiz yog‘ mahsulotlari muomalaga kiritilishining oldi olingandi.
• Xorazmda inson sog‘lig‘i uchun xavfli spirtli ichimliklarni tayyorlab kelgan shaxs faoliyatiga chek qo‘yilgan. 
• Namanganda 550 million so‘mlik dori vositalari yo‘q qilingani to‘g‘risida xabar berilgandi.