Toshkent shahrining Shayxontohur va Xorazm viloyatining Xiva tumanida aksiz markasiz tamaki va isteʼmolga yaroqsiz alkogol mahsulotlarini sotayotgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Shayxontohur tuman bo‘limi tomonidan o‘tkazilgan tezkor tadbirda qonunga xilof ravishda tamaki mahsulotlari savdosi bilan shug‘ullanib kelgan J.I. xaridorga 1 quti aksiz markasiz tamaki mahsulotini sotgan vaqtida ushlanib, uning yonidan sotish maqsadida olib kelingan umumiy bahosi 64,6 mln so‘m bo‘lgan, jami 3 385 quti xorijda ishlab chiqarilgan aksiz markasiz tamaki mahsulotlari ashyoviy dalil sifatida olingan.
Shu kabi departamentning Xiva tuman bo‘limi tomonidan alkogol va tamaki mahsulotlarini noqonuniy muomalaga kiritilishining oldini olish yuzasidan o‘tkazilgan tezkor-qidiruv tadbirida tumandagi Gandimyon diyori ko‘chasida joylashgan savdo do‘konida 257 dona qalbaki aksiz markali alkogol mahsulotlari sotuvga qo‘yilganligi aniqlanib, ushbu mahsulotlar ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)