Sirdaryodan Toshkentga olib ketilayotgan 1 tonnaga yaqin isteʼmolga yaroqsiz go‘sht to‘xtatib qolindi

Sirdaryodan Toshkentga olib ketilayotgan 941 kilo isteʼmolga yaroqsiz go‘sht to‘xtatib qolindi. Bu haqda viloyat IIB matbuot xizmati xabar qildi.

“Sirdaryo” YPX maskanida mutasaddi tashkilotlar xodimlari bilan hamkorlikda o‘tkazilgan tadbir davomida Samarqand–Toshkent yo‘nalishida harakatlanib kelayotgan Isuzu avtotransport vositasi xolislar ishtirokida to‘xtatilib tekshirilganda, Samarqand viloyati, Kattaqo‘rg‘on tumanida yashovchi, fuqaro X.Sh boshqaruvidagi avtotransport yukxonasida hech qanday hujjatlarsiz, kelib chiqishi nomaʼlum bo‘lgan 941 kilo hayvon go‘shti borligi aniqlangan.

Viloyat Hayvonlar kasalliklari tashxisi va oziq-ovqat mahsulotlari xavfsizligi davlat markazi mutaxassislari Sirdaryo viloyati IIB tomonidan laboratoriya tekshiruvlari uchun namunalar olindi.

Hozirda aniqlangan holat yuzasidan Sirdaryo viloyati IIB Tezkor qidiruv xizmati Jinoyat qidiruv boshqarmasi masʼul xodimlari tomonidan surishtiruv harakatlari olib borilmoqda.