Xorazmda maktab direktori o‘qituvchilar maoshining 10 foizini yig‘ib olayotgani haqidagi xabarlar o‘z tasdig‘ini topmadi

Xorazm viloyati Maktabgacha va maktab taʼlimi boshqarmasi Yangiariq tumanidagi maktab direktori o‘qituvchilardan pul yig‘ib olayotgani aytilgan xabarlarga munosabat bildirdi.

Facebook ijtimoiy tarmog‘ida Yangiariq tumanidagi 4-sonli maktab direktori har bir o‘qituvchidan oylik maoshining 10 foizini keltirib seyfga tashlashini, kim eʼtiroz bildirsa, ishdan bo‘shashi to‘g‘risida ariza yozishini talab etayotgani yuzasida murojaat tarqaldi.

Mazkur holat Xorazm viloyati Maktabgacha va maktab taʼlimi boshqarmasi ishchi guruhi tomonidan o‘rganilgan. Holatga aniqlik kiritish maqsadida shu maktabda faoliyat olib borayotgan 83 nafar pedagog o‘rtasida anonim so‘rovnoma o‘tkazilgan.

So‘rovnoma natijalariga ko‘ra, maktab direktorning har bir o‘qituvchidan maoshining 10 foizini seyfga tashlashini talab qilgani holati o‘z isbotini topmagan.

Avvalroq Namanganda maktab direktori o‘rinbosari o‘qituvchilar nomiga kredit olgani aniqlangan edi. Vazifasiga nisbatan sovuqqonlik bilan yondashgan muassasa direktorining o‘rinbosari lavozimidan ozod qilingan.