Gruziya parlamentining Huquq qo‘mitasi mamlakatda davom etayotgan norozilik namoyishlari va Yevropa Ittifoqining tanqidlari fonida xorijiy agentlar to‘g‘risidagi qonun loyihasini uchinchi o‘qishda ma’qulladi. Bu haqda tegishli manbalarga tayanib, Deutsche Welle xabar berdi.
Qo‘mita yig‘ilishi roppa-rosa ikki daqiqada yakunlangan.
Biz, muxolifatchilar, hujjatni ikki daqiqada imzoladik, — dedi muxolifatchi deputatlardan biri.
1-may kuni Gruziya parlamenti “Xorijiy agentlar to‘g‘risida”gi qonun loyihasini ikkinchi o‘qishda qabul qilgan edi, 83 deputat uni qo‘llab-quvvatlagan, 23 deputat qarshi chiqqan.
Hukmron “Gruziya orzusi” partiyasi qonunni may oyi o‘rtalariga qadar kuchga kiritish niyatida. Qonun moliyalashtirishning kamida 20 foizini xorijdan oladigan tashkilotlarni rasmiy ro‘yxatdan o‘tkazishni talab etadi.
Tanqidchilar hujjatda Rossiyaning “xorijiy agentlar” qonuni bilan yaqqol o‘xshashliklarni ko‘rmoqda, bu esa Rossiya rasmiylariga tanqidiy ommaviy axborot vositalari va tashkilotlarga nisbatan keskin choralar ko‘rish imkonini bergan.
Gruziya hukumati bu qonun loyihasi davlat suverenitetini mustahkamlash uchun muhim ekanini da’vo qilmoqda.
Gruziya bosh vaziri Irakliy Kobaxidze hukmron partiya ushbu qonunning qabul qilinishiga qarshi bo‘lgan prezident Salome Zurabishvilining vetosini yengib o‘ta olishiga ishonch bildirgan.
Izoh (0)