Yevropa Ittifoqi Markaziy Osiyodagi barqaror transport aloqalariga 10 milliard yevro sarmoya kiritishga tayyorligini ma’lum qildi. Bu haqda Yevropa Ittifoqining Tojikistondagi delegatsiyasi xabar berdi.
Tojikistonga 30 va 31-may kunlari Yevrokomissiyasining Xalqaro hamkorlik bo‘yicha Bosh direktorati katta maslahatchisi Henrik Xololey boshchiligidagi yuqori darajadagi missiya tashrif buyurdi.
“Yevropa Ittifoqi xalqaro hamkorlarning birgalikdagi hissasi sifatida Markaziy Osiyoda barqaror transport aloqasiga 10 milliard yevro sarmoya kiritish majburiyatini e’lon qildi”, — deyiladi xabarda.
Yevrokomissiya Yevropa Ittifoqining Global Gateway strategiyasi doirasida Transkaspiy transport koridorini qo‘llab-quvvatlash uchun mintaqaviy transport dasturini tayyorlamoqda.
Global Gateway Yevropa Ittifoqining raqamli, energetika va transport sohalarida aqlli, yashil va xavfsiz aloqani rivojlantirish, shuningdek, butun dunyo bo‘ylab sog‘liqni saqlash, ta’lim va tadqiqot tizimlarini mustahkamlash bo‘yicha yangi strategiyasining bir qismidir. Tashabbus 2021-yilda Yevropa komissiyasi va Yevropa Ittifoqining Oliy vakili tomonidan taqdim etilgan.
Eslatib o‘tamiz, 2024-yil yanvar oyida Bryusselda bo‘lib o‘tgan investorlar forumida Markaziy Osiyoning beshta davlati vakillari Yevropa va mintaqa o‘rtasidagi transport yo‘nalishlarini mustahkamlash, shu orqali mintaqaviy integratsiyani yaxshilash tarafdori ekanini bildirgandi.
Izoh (0)