Gruziya parlamenti ko‘pchilik ovoz bilan prezident Salome Zurabishvilining “Xorijiy agentlar” to‘g‘risidagi munozarali qonunga veto qo‘yishini bekor qilishga muvaffaq bo‘ldi. Bu haqda BBC xabar berdi.
Ushbu qonunning qabul qilinishi Gruziya jamiyatining noroziligiga, AQSH va Yevropa Ittifoqining tanqidiga hamda Tbilisida keng ko‘lamli namoyishlarga sabab bo‘lgan.
Hukmron “Gruziya orzusi” partiyasidan 84 deputat prezident vetosini bekor qilish uchun ovoz bergan. Prezident vetosini bekor qilish uchun parlamentdagi 150 nafardan kamida 76 nafarining ovozi kerak bo‘lgan.
Muxolifatdagi Birlashgan milliy harakat partiyasi deputati Anna Sitlidzening aytishicha, xorijiy agentlar haqidagi qonun ko‘p muammolarni keltirib chiqaradi.
Bizning Yevropa Ittifoqiga kirishimiz taqiqlanadi, Gruziya uchun Yevropa bilan vizasiz rejim bekor qilinishi mumkin. G‘arb davlatlari bizga qarshi sanksiyalar joriy etishi aniq, bu Gruziya iqtisodiyotiga bevosita ta’sir qiladi, — deydi deputat.
Sitlidzega ko‘ra, amaldagi hokimiyat vakillari o‘zlarining o‘ylamasdan olib borayotgan siyosati bilan jamiyatda qarama-qarshiliklarni keltirib chiqargan. Hukmron partiya vakillari o‘z raqiblarini Gruziya manfaatlariga xiyonat qilishda ayblagan.
Eslatib o‘tamiz, avvalroq Gruziya prezidenti Salome Zurabishvili mamlakat parlamenti tomonidan uchinchi o‘qishda qabul qilingan, “Xorijiy ta’sirning ochiqligi to‘g‘risida”gi qonunga veto qo‘ygan edi.
Izoh (0)