Rossiyalik deputat Crocus’ni qo‘riqlagan kompaniya xodimlari terakt sodir bo‘lganda voqea joyiga yetib bormaganini aytdi

Rossiya Davlat dumasi deputati Aleksandr Xinshteyn Crocus City Hall’ni qo‘riqlagan xususiy qo‘riqlash kompaniyasini tanqid qildi. Uning so‘zlariga ko‘ra, favqulodda yordam guruhi terakt sodir bo‘lgan konsert zaliga qo‘shni binoda joylashgan, ammo voqea joyiga yetib bormagan.

“Crocus City Hall’ni qo‘riqlagan Crocus Profi xususiy qo‘riqlash kompaniyasida bir necha o‘nlab harbiy xizmat qurollari bo‘lgan.

Bu qurollar terakt sodir bo‘lgan konsert zaliga qo'shni binoda saqlanadi, ammo qo‘riqchilar o‘sha kuni qurolsiz va maxsus vositalarsiz xizmat o‘tashgan. 

Xususiy xavfsizlik tashkilotining favqulodda yordam guruhi ham o‘sha qo‘shni binoda joylashgan, ammo ular ham terakt boshlangandan keyin voqea joyiga bormagan”, — dedi Rossiya Davlat dumasi deputati Aleksandr Xinshteyn.

22-mart kuni 4 nafar qurollangan shaxs Crocus City Hall konsert zaliga bostirib kirib, odamlarga qarata o‘q uzgan, keyin esa binoga o‘t qo‘ygan. Terakt oqibatida halok bo‘lganlar soni 144 nafarga yetgani ma’lum qilindi.