Rossiya prezidenti Vladimir Putin tojikistonlik hamkasbi Emomali Rahmon bilan teraktni muhokama qildi. Bu haqda Kreml xabar berdi.
Tojikiston prezidenti telefon suhbatida Moskva viloyatidagi teraktni qoraladi. Tojikiston va Rossiya terrorizmga qarshi birgalikda kurashni davom ettirish niyatini tasdiqladi.
“Rossiyadagi milliy motam vaqtida davlatimiz rahbari barcha Tojikiston fuqarolarining qardosh rus xalqi bilan birdamligini alohida taʼkidladi”, — deyiladi Kreml xabarida.
Suhbat chog‘ida Emomali Rahmon “terrorchilarning millati, vatani, dini yo‘qligini” ta’kidlagan.
“Prezident jabrlanganlarning tezroq sog‘ayib ketishini tilab, mudhish fojiada halok bo‘lganlarning oila a’zolari va yaqinlariga chuqur hamdardlik bildirdi”, — deyiladi Tojikiston prezidenti matbuot xizmati xabarida.
23-mart kuni Moskva viloyatidagi Crocus City Hall da sodir etilgan terakt yuzasidan 11 kishi qo‘lga olindi. OAVda hibsga olinganlar orasida Tojikiston fuqarolari ham borligi haqida maʼlumotlar paydo bo‘ldi.
Tojikiston Tashqi ishlar vazirligi Rossiya rasmiylaridan mamlakat fuqarolarining teraktga aloqadorligi haqida maʼlumot olmaganini maʼlum qildi. Mamlakatning Rossiyadagi elchixonasi vatandoshlarini ommaviy tadbirlarda qatnashmaslikka chaqirdi.
Gumonlanuvchilar qo‘lga olingan kuni bir qator Telegram kanallarida Tojikistonning to‘rt fuqarosi teraktda ishtirok etgan bo‘lishi mumkinligi haqida xabar tarqalib, ularning surati e’lon qilindi. Jumladan, Rivojiddin Islomov va Maxmadrasul Nasriddinovlarning ism-shariflari va fotosuratlari chop etildi.
Keyinroq Tojikiston Ichki ishlar vazirligi Telegram kanallaridagi maʼlumotni rad etib, ushbu respublika fuqarolari 2023-yil 26-noyabr kuni Rossiyadan qaytib kelgani, terakt sodir bo‘lgan vaqtda Tojikistonda yashash joyida bo‘lganini maʼlum qildi. Respublika Ichki ishlar vazirligi ham ularning pasportlar bilan tushgan suratlarini chop etdi.
Izoh (0)