Qozog‘iston rasmiylari Toshkentdan yaxshi narx taklifi bo‘lsa, O‘zbekistonga neft yetkazib berish hajmini oshirish masalasini ko‘rib chiqishga tayyor. Bu haqda Qozog‘iston Energetika vazirligi matbuot xizmati xabar berdi.
“O‘zbekistonga neft yetkazib berish Shag‘ir neft quyish stansiyasi (Chimkent) va Qosimov neft nasos stansiyasidan (Atirau) amalga oshirilmoqda. Agar O‘zbekiston tomoni Xitoy yoki boshqa xorijiy davlatlardan ko‘ra yaxshiroq narx va shartlarni taklif qilsa, biz yetkazib berish hajmini oshirishni ko‘rib chiqishga tayyormiz”, — deyiladi xabarda.
Qayd etilishicha, bu masala allaqachon O‘zbekiston va Qozog‘iston mutassaddilari o‘rtasida muhokama qilingan. Energetika vazirligi maʼlumotlariga ko‘ra, 2022-yil yakuniga ko‘ra, Qozog‘iston neftining O‘zbekistonga eksporti umumiy hajmning 0,13 foizini tashkil qilgan.
“Qozog‘iston hududi orqali 300 ming tonna Rossiya neftini tranzit qilish bo‘yicha kelishuvga muvofiq, yil boshidan buyon 79 ming tonna neft yetkazib berildi. Shu bilan birga, 2022-yilda Qozog‘iston neftining O‘zbekistonga eksporti hajmi 87 ming tonnaga, joriy yilning to‘qqiz oyi yakunlari bo‘yicha esa 46 ming tonnaga yetdi”, — deyiladi vazirlik xabarida.
Izoh (0)