Qozog‘iston Tashqi ishlar vazirligi rasmiy vakili Aybek Smadiyarov respublika rasmiylari mamlakat haqida salbiy gapiradigan xorijliklar reyestrini yuritishini ma’lum qildi. Bu haqda Tengrinews xabar berdi.
“Tabiiyki, biz ushbu ro‘yxatni yuritmoqdamiz. Ammo bu ishchi ro‘yxat va uni oshkor qilmaymiz. Raqamni ham ayta olmayman”, — dedi Smadiyarov matbuot brifingida.
Shuningdek, u ro‘yxatdagi shaxslarga mamlakatga kirish taqiqlanishini qo‘shimcha qildi.
2022-yil iyun oyida Qozog‘iston telegraf agentligi rossiyalik teleboshlovchi Tigran Keosayan Qozog‘istonga kirishi taqiqlanganlar ro‘yxatiga kiritilgani haqida xabar bergandi.
“Chegarada darhol unga ‘qizil bayroqlar’ qo‘yildi. Keosayandan tashqari bu ro‘yxatga Qozog‘istonda taqiqlangan terrorchilar va boshqa istalmagan shaxslar ham kiritilgan”, — dedi agentlik manbasi.
Keyinroq Qozog‘iston Tashqi ishlar vazirligi vakili Aybek Smadiyarov rasmiylar Keosayanning mamlakatga kirishini taqiqlash niyatida ekanini tasdiqladi. Shu bilan birga, Smadiyarov kirishi taqiqlangan shaxslar ro‘yxati teleboshlovchi bilan sodir bo‘lgan voqeadan oldin paydo bo‘lganini ta’kidladi.
Izoh (0)