Qozog‘iston hukumati mahalliy korxonalarni qo‘llab-quvvatlash uchun Mudofaa-sanoat kompleksini rivojlantirish jamg‘armasini tuzish qarorini tasdiqladi. Hukumat yig‘ilishida respublika bosh vaziri Alixan Smailov jamg‘arma yil oxirigacha yaratilishini ma’lum qildi, deb xabar bermoqda Kazakhstan today.
Hukumat rahbari, shuningdek, o‘tgan hafta Qozog‘istonda ilk bor “Innoprom” xalqaro sanoat ko‘rgazmasi o‘tkazilganini, uning asosiy mavzusi yangi davr sanoat strategiyasi bo‘lganini ham eslatdi.
“Global tendensiyalarni hisobga olgan holda, Sanoat vazirligi va manfaatdor davlat idoralari korxonalarda innovatsion texnologiyalarni joriy etishni rag‘batlantirish bo‘yicha yangi yondashuvlarni ishlab chiqishi kerak”, — dedi Qozog‘iston bosh vaziri.
Sentyabr oyi boshida Qozog‘iston prezidenti Qosim-Jo‘mart To‘qayev mamlakatning o‘zida mudofaa ishlab chiqarish siklini yaratish Qozog‘istonning importga qaramligini kamaytiradigan eng muhim vazifa ekanini aytgandi.
“Qozog‘iston armiyasi yuqori texnologiyali qurol-yarog‘ va harbiy texnika, jumladan zirhli texnika, uchuvchisiz uchar apparatlar va zamonaviy o‘q otish qurollari bilan taʼminlanishi kerak”, — deya ta’kidlagan To‘qayev.
Bugungi kunda Qozog‘istonda harbiy texnikaning to‘liq ishlab chiqarish sikliga ega korxonalar mavjud emas.
Sanoat va infratuzilmani rivojlantirish vazirligi 2022-yil dekabr oyida Mudofaa sanoatini rivojlantirish jamg‘armasini tashkil etish to‘g‘risidagi hukumat qarori loyihasini tayyorlagandi. Uning faoliyati asosiy mavzusi mahalliy ilmiy-texnik ishlanmalarni moliyaviy qo‘llab-quvvatlash va harbiy-sanoat kompleksi tashkilotlarini modernizatsiya qilishdir.
Ma’lumot uchun 2019-yilda Qozog‘istonning harbiy budjeti 1,8 milliard dollarni, 2020-yilda – 1,5 milliard dollarni, 2021-yilda – 1,6 milliard dollarni, 2022 yilda – 1,1 milliard dollarni tashkil etgan.
Izoh (0)