Qozog‘iston hukumati sarmoyaviy muhitni yaxshilash bo‘yicha kengash yig‘ilishini o‘tkazdi, deb xabar bermoqda Qozog‘iston bosh vaziri matbuot xizmati. Jahon banki va Ernst & Young, AstraZeneca, Janssen va Pfizer kompaniyalari vakillari ishtirokidagi yig‘ilishni Alixan Smailov olib bordi. Qozog‘istonda sog‘liqni saqlash sohasini yanada rivojlantirish masalalari muhokama qilindi.
“Umuman olganda, hukumat ushbu sohani rivojlantirishning barqaror modelini yaratish, uni moliyalashtirish darajasini 2027-yilgacha YIMning 5 foiziga yetkazish ustida ishlamoqda. Bu borada biz sarmoya va ilg‘or texnologiyalarni jalb etishdan manfaatdormiz. Biz ko‘rayotgan chora-tadbirlar sohaning sarmoyaviy jozibadorligiga ijobiy ta’sir ko‘rsatmoqda.
Shunday qilib, o‘tgan yil yakunlariga ko‘ra, sog‘liqni saqlash sohasiga asosiy kapitalga yo‘naltirilgan investitsiyalar qariyb 30 foizga oshib, qariyb 540 million dollarni tashkil etdi. So‘nggi 7 yilda farmatsevtika bozori hajmi 2,9 barobar oshdi”, — dedi Alixan Smailov.
Smailovning aytishicha, AstraZeneca Qozog‘istonda original dori vositalari ishlab chiqarishga 32 million dollar sarmoya kiritadi. Bundan tashqari, Qozog‘iston prezidentining AQSHga tashrifi chog‘ida GE Healthcare kompaniyasi bilan kelishuv imzolangan bo‘lib, unga ko‘ra, tibbiy asbob-uskunalar ishlab chiqarishni mahalliylashtirish uchun 60 million dollar ajratiladi.
“Dori vositalariga talab ortib borayotgan bir sharoitda sog‘liqni saqlash sohasi, jumladan, farmatsevtika sanoatini yanada rivojlantirish uchun ulkan salohiyat mavjud”, – dedi Alixan Smailov.
Hozirda Qozog‘iston Respublikasi hukumati Pfizer kompaniyasi bilan dori vositalari ishlab chiqarishni mahalliylashtirish bo‘yicha investitsiya shartnomasini tuzishni rejalashtirmoqda, Roche bilan esa 2,5 million dollarlik bir qator loyihalar, Janubiy Koreya investorlari bilan pudrat ishlab chiqarish loyihalari ustida ishlamoqda. Turkiya, Misr va Isroil ham loyihalarni amalga oshirishning turli bosqichlarida.
Izoh (0)