Қозоғистон расмийлари Тошкентдан яхши нарх таклифи бўлса, Ўзбекистонга нефть етказиб бериш ҳажмини ошириш масаласини кўриб чиқишга тайёр. Бу ҳақда Қозоғистон Энергетика вазирлиги матбуот хизмати хабар берди.
“Ўзбекистонга нефть етказиб бериш Шағир нефть қуйиш станцияси (Чимкент) ва Қосимов нефть насос станциясидан (Атирау) амалга оширилмоқда. Агар Ўзбекистон томони Хитой ёки бошқа хорижий давлатлардан кўра яхшироқ нарх ва шартларни таклиф қилса, биз етказиб бериш ҳажмини оширишни кўриб чиқишга тайёрмиз”, — дейилади хабарда.
Қайд этилишича, бу масала аллақачон Ўзбекистон ва Қозоғистон мутассаддилари ўртасида муҳокама қилинган. Энергетика вазирлиги маълумотларига кўра, 2022 йил якунига кўра, Қозоғистон нефтининг Ўзбекистонга экспорти умумий ҳажмнинг 0,13 фоизини ташкил қилган.
“Қозоғистон ҳудуди орқали 300 минг тонна Россия нефтини транзит қилиш бўйича келишувга мувофиқ, йил бошидан буён 79 минг тонна нефть етказиб берилди. Шу билан бирга, 2022 йилда Қозоғистон нефтининг Ўзбекистонга экспорти ҳажми 87 минг тоннага, жорий йилнинг тўққиз ойи якунлари бўйича эса 46 минг тоннага етди”, — дейилади вазирлик хабарида.
Изоҳ (0)