O‘zbekistonda 2023-yilning sakkiz oyida 2121 nafar voyaga yetmaganlar tomonidan 2024 ta jinoyat sodir etilgan. Bu haqda IIV Jamoat xavfsizligi departamentiga tayanib, O‘zA xabar berdi.

Ma’lumotlarga ko‘ra, jinoyatlarda 1424 nafar maktab, 291 nafar akademik litsey va kasb-hunar taʼlimi muassasalari o‘quvchilari, 142 nafar ishlamasdan yurganlar (maktabni tamomlagan) hamda 264 nafar ishlaydigan voyaga yetmaganlar ishtirok etgan.

Statistik ma’lumotlarga ko‘ra, 2021-yilda 1472 nafar voyaga yetmagan shaxs sudlangan bo‘lsa, 2022-yilda bu ko‘rsatkich 2116 nafarga yetgan. O‘tgan 2022-yilda ijtimoiy xavfi katta bo‘lmagan jinoyatlar 389 ta, uncha og‘ir bo‘lmagan jinoyatlar soni esa 510 tani tashkil qilgan.

Avvalroq Oliy Majlis Senatining Yoshlar, madaniyat va sport masalalari qo‘mitasi majlisida “Voyaga yetmaganlarga nisbatan jinoiy javobgarlik yanada liberallashtirilishi munosabati bilan O‘zbekiston Respublikasining Jinoyat kodeksiga qo‘shimcha va o‘zgartirishlar kiritish to‘g‘risida”gi qonun muhokama qilingandi. Mazkur qonun bilan 18 yoshga to‘lguniga qadar sodir etgan o‘ta og‘ir bo‘lmagan jinoyati uchun jazoni o‘tab bo‘lgan shaxs sudlanmagan deb hisoblanishi belgilanmoqda.