Ichki ishlar vaziri general-leytenant Po‘lat Bobojonov O‘zbekiston aholisiga murojaat bilan chiqdi. Murojaat matni “Yangi O‘zbekiston” nashri tomonidan e’lon qilindi.
Bobojonovga ko‘ra, ichki ishlar organlarini isloh qilish jarayonlarida jinoyatchilikka qarshi kurashish, ijtimoiy xavfli qilmishlarni fosh etish va barvaqt oldini olish borasidagi yondashuvlar tubdan o‘zgartirilgan.
Bugungi kunda ichki ishlar tizimidagi har bir rahbar va xodimning kundalik xizmat faoliyatida raqam va foizlar ortidan quvish emas, balki fuqarolarning haq-huquqlarini amalda himoya qilish birinchi galdagi vazifaga aylanmoqda. Jinoyatchilikni yangicha uslubda tahlil etish, xodimlar ish samaradorligini ularning xizmat vazifasini qay darajada sifatli va malakali bajarishiga qarab baholash mexanizmi joriy etilgani ish sifati va mazmunini tubdan yaxshilash imkonini bermoqda.
Shu bilan birga, Bobojonov 28-iyul kuni Farg‘ona shahrida Ichki ishlar vazirligi hayʼatining Shavkat Mirziyoyev raisligida bo‘lib o‘tgan kengaytirilgan yig‘ilishida tizimdagi ishlar chuqur tahlil qilinib, hal etilishi lozim bo‘lgan masalalar aniq ko‘rsatib berilganini qayd etgan.
Shulardan kelib chiqib, mavjud muammolarga yechim topish, aholi uchun xavfsiz yashash va mehnat sharoitlarini yaratish borasida ichki ishlar organlari tomonidan qator vazifalar belgilab olingan.
“Achchiq bo‘lsa ham tan olish kerak: to‘qqiz yarim mingga yaqin mahallaning 1,5 mingdan ziyodida kriminogen vaziyat murakkabligicha qolmoqda. Tahlillar ko‘rsatmoqdaki, mahalladagi jinoyatchilikning ildizi ko‘pincha ijtimoiy muammolarga borib taqalmoqda”, — deydi vazir.
Shuning uchun huquqbuzarliklarning oldini olish bo‘yicha “ijtimoiy profilaktika” tizimini to‘g‘ri yo‘lga qo‘yish orqali profilaktika inspektori, mahalla raisi, hokim yordamchisi, yoshlar yetakchisi, xotin-qizlar faolidan iborat “mahalla beshligi” hamkorligi yanada kuchaytirilishi qayd etilgan.
Bundan tashqari Po‘lat Bobojonovning so‘zlariga ko‘ra, tizimda maʼnaviy-axloqiy masalalarga eʼtibor tubdan o‘zgaradi. Ichki ishlar organlari xodimlari har kuni minglab fuqaro bilan muloqotga kirishadi. Bu jarayonda ularning xushmuomala bo‘lishi, fuqarolar muammolariga qonuniy yechim topishi aholi, umuman, jamiyatdagi ijtimoiy kayfiyatga juda katta taʼsir ko‘rsatadi.
“Bundan buyon ham kadrlarni tayyorlash, tanlash va joy-joyiga qo‘yish hamda tizimni nopok, g‘arazli niyatdagi, o‘z manfaatlarini xalq manfaatidan ustun qo‘yadigan shaxslardan tozalash ishlari diqqatimiz markazida bo‘ladi”, — deydi IIV rahbari.
May oyida sobiq ichki ishlar xodimi, Toshkent shahrida YPX mansabdori lavozimida ishlagan fuqaro ichki ishlar vaziri Po‘lat Bobojonov qabulida bo‘lib, lavozimidan nohaq olinganini, unga nisbatan o‘tkazilgan xizmat tekshiruvi adolatsiz bo‘lganini aytib, ko‘mak so‘ragani to‘g‘risida xabar berilgandi.
Izoh (0)