Buxoro viloyatida og‘ir va o‘ta og‘ir jinoyatlar ortayotgani ma’lum bo‘ldi

Buxoro viloyatida 2023-yilning yetti oyi mobaynida viloyatda jami 2683 ta jinoyat qayd etildi, deb xabar beradi O‘zA.

Ma’lum qilinishicha, ushbu ko‘rsatkich o‘tgan yilga nisbatan 67 taga ko‘paygan. Jumladan, talonchilik 8 taga, tovlamachilik 6 taga, firibgarlik 9 taga, bezorilik 17 taga ortgan.

Shuningdek, o‘tgan yetti oy mobaynida jami 819 ta og‘ir va o‘ta og‘ir jinoyat qayd etilib, o‘tgan yilga nisbatan 39 taga yoki 5 foizga oshgan.

Avgust oxirlarida Buxoro viloyati IIB boshlig‘i polkovnik Mirjamol Miralimovning tegishli farmoyishi asosida Ma’naviyat va ma’rifat mobil targ‘ibot guruhlari tomonidan mahallalarda, jamoat joylari, korxona-tashkilotlarda targ‘ibot-tashviqot ishlari olib borish boshlangan edi. 

Unda targ‘ibot guruhlarining asosiy vazifalari viloyatda jinoyatchilikka, ayniqsa, firibgarlik hamda o‘g‘irlik jinoyatlariga qarshi kurashish, ularning barvaqt oldini olish, aholining internet jahon axborot tarmog‘idan foydalanish madaniyatini oshirish, g‘oyaviy va axborot xurujlariga qarshi mafkuraviy immunitetni kuchaytirish va yoshlar tarbiyasiga mas’uliyatsizlik kabi illatlarga barham berishga qaratilgan kompleks chora-tadbirlarni amalga oshirishdan iborat.