Chirchiq shahridagi ko‘p qavatli uyning bir tomoni cho‘kib, yonboshlab qolgani aytildi. Vazirlik holatni o‘rganmoqda

Tarmoqlarda Toshkent viloyatining Chirchiq shahrida qurilish kompaniyasi tomonidan qurib bitkazilgan va hali topshirilganiga bir yil ham bo‘lmagan ko‘p qavatli uy cho‘kib, yonboshlab qolgani aytilgan video tarqaldi. Qurilish va uy-joy kommunal xo‘jaligi vazirligi holat o‘rganilayotganini, o‘rganish natijalari ma’lum qilinishini bildirdi. 

Chirchiq shahar hokimligi axborot xizmatining “Daryo”ga bildirishicha, mazkur uy 9 qavatli. 

Facebook foydalanuvchisi uy haqida xabar berar ekan, Golden House kompaniyasi tomonidan qurilgan ko‘p qavatli uy, bir yil o‘tmasdan yonboshlab qolibdi. Uyda aholi yashamoqda. Mutasaddilar, mutaxassislarni chaqirib tekshirib qo‘ying! Bizning quruvchilar bilan aytib bo‘lmaydi-da. Yoxud shunda ham chuqurlashmaylikmi, uyda yashovchilarning o‘zi uyni qiyshaymay yashatishi kerakmi?”, — deya holatga munosabat bildiradi. 

Mazkur xabarga munosabat bildirgan Qurilish va uy-joy kommunal xo‘jaligi vazirligi holat nazoratga olinganini bildirdi. 

Toshkent viloyatining Chirchiq shahri “Iftixor” MFY hududida qurilib, foydalanishga topshirilgan mazkur ko‘p qavatli uyda yuzaga kelgan holat hozirda Qurilish va uy-joy kommunal xo‘jaligi vazirligining qurilish loyiha tashkilotlari mutaxassislari, qurilish sohasida hududiy nazorat inspeksiyasi mas’ullari tomonidan nazoratga olingan. O‘rganish natijalari bo‘yicha batafsil ma’lumot taqdim qilinadi, — deyiladi vazirlik munosabatida.