Qashqadaryo viloyatining Qarshi shahridagi ixtisoslashtirilgan maktab-internati bitiruvchilarining barchasi OTMlar talabasiga aylanib, maktab bitiruvchilarining oliygohlarga kirish ko‘rsatkichida 100 foizlik natijani qayd etdi. Bu haqda “Daryo”ga viloyat Maktabgacha va maktab taʼlimi boshqarmasi axborot xizmati rahbari Javohir Rustamov xabar berdi.
Maʼlum qilinishicha, bunday natija Qarshi shahridagi 1-sonli ixtisoslashtirilgan maktab-internatida qayd etilgan.
Maktabning birinchi qaldirg‘ochlari 100 foizlik natija bilan berilgan bilim-ko‘nikmalari asosida yurtimizdagi nufuzli universitetlar hamda Qurolli kuchlar akademiyasi, Chirchiq oliy tank qo‘mondonligi bilim yurti talabalari bo‘lish baxtiga erishdi, — deydi boshqarma axborot xizmati rahbari Javohir Rustamov.
Qo‘shimcha qilinishicha, ushbu maktab aniq fanga ixtisoslashtirilgan maktab bo‘lib, 2022-yil prezident qarori bilan tashkil etilgan. Maktab 400 o‘rinli bo‘lib, ayni kunda 375 nafar bolaga taʼlim-tarbiya beradi.
Maktabni tamomlaganlar orasida filologiya, jurnalistika va boshqa yo‘nalishlarda ham yuqori ball bilan davlat granti asosida o‘qishga qabul qilinganlarning borligi maktabda yaxshi bilimga ega bo‘lgan ustozlar ko‘pligidan dalolat beradi, — deydi masʼul.
Maktab direktori Nozima Oripovaning “Daryo”ga bildirishicha, maktabda faoliyat yurituvchi 35 nafar o‘qituvchining 33 nafari oliy toifali o‘qituvchilar hisoblanadi.
Izoh (0)