Қашқадарё вилоятининг Қарши шаҳридаги ихтисослаштирилган мактаб-интернати битирувчиларининг барчаси ОТМлар талабасига айланиб, мактаб битирувчиларининг олийгоҳларга кириш кўрсаткичида 100 фоизлик натижани қайд этди. Бу ҳақда “Дарё”га вилоят Мактабгача ва мактаб таълими бошқармаси ахборот хизмати раҳбари Жавоҳир Рустамов хабар берди.
Маълум қилинишича, бундай натижа Қарши шаҳридаги 1-сонли ихтисослаштирилган мактаб-интернатида қайд этилган.
Мактабнинг биринчи қалдирғочлари 100 фоизлик натижа билан берилган билим-кўникмалари асосида юртимиздаги нуфузли университетлар ҳамда Қуролли кучлар академияси, Чирчиқ олий танк қўмондонлиги билим юрти талабалари бўлиш бахтига эришди, — дейди бошқарма ахборот хизмати раҳбари Жавоҳир Рустамов.
Қўшимча қилинишича, ушбу мактаб аниқ фанга ихтисослаштирилган мактаб бўлиб, 2022 йил президент қарори билан ташкил этилган. Мактаб 400 ўринли бўлиб, айни кунда 375 нафар болага таълим-тарбия беради.
Мактабни тамомлаганлар орасида филология, журналистика ва бошқа йўналишларда ҳам юқори балл билан давлат гранти асосида ўқишга қабул қилинганларнинг борлиги мактабда яхши билимга эга бўлган устозлар кўплигидан далолат беради, — дейди масъул.
Мактаб директори Нозима Орипованинг “Дарё”га билдиришича, мактабда фаолият юритувчи 35 нафар ўқитувчининг 33 нафари олий тоифали ўқитувчилар ҳисобланади.
Изоҳ (0)