Farg‘ona viloyatida 45 ta isteʼmolchi elektr energiyasi va tabiiy gazdan noqonuniy foydalanib kelgani aniqlandi, deb xabar beradi Energetika vazirligi matbuot xizmati.
Ma’lum qilinishicha, “O‘zenergoinspeksiya” va huquqni muhofaza qiluvchi organlar bilan hamkorlikda so‘nggi o‘n kunda Farg‘ona viloyatida o‘tkazilgan nazorat tadbirlarida 45 ta holatda isteʼmolchilar tomonidan tabiiy gaz va elektr energiyasidan noqonuniy foydalanish holatlari aniqlangan.
Buning natijasida 599 million 300 ming metr kub tabiiy gaz va 1 million 236 ming kVt/soat elektr energiyasi talon-toroj qilingan bo‘lib, tizimga yetkazilgan 1 milliard 722 million so‘m zarar undirishga qaratilgan.
Maʼlumot uchun, ushbu hajmdagi tabiiy gaz qariyb 3 mingta, elektr energiyasi esa 6 mingta xonadonning bir oylik isteʼmoliga tengdir.
Qoidabuzar isteʼmolchilarga nisbatan belgilangan tartibda choralar ko‘rilib, tegishli hujjatlar huquqni muhofaza etuvchi organlarga taqdim qilingan.
O‘zbekistonda 2023-yilning 6 oyida elektr energiyasidan noqonuniy foydalanish tufayli 78,5 milliard so‘m, tabiiy gazdan noqonuniy foydalanish sababli esa 231 milliard 866 million so‘m zarar ko‘rilgan. Bundan oldin Buxoro shahrida faoliyat yuritib kelayotgan korxona elektr hisoblagichga tashqi taʼsir ko‘rsatishi natijasida tizimga 2 milliard so‘mlik zarar yetkazilgani to‘g‘risida xabar berilgandi.
Izoh (0)