Tanzila Norboyeva 24-avgust kuni Oliy Majlis Senatining qirq to‘rtinchi yalpi majlisida Namangan shahri aholisi uchun alohida perinatal markaz tashkil etish masalasini ko‘tardi.
Uning qayd etishicha, bugungi kunda aholisi soni 1 millionga yaqinlashgan Namangan shahrida 4 ta tug‘uruqxona faoliyat yuritmoqda. Viloyat perinatal markazi ham shu hisobda (250 o‘rinli).
Shahar aholisi, jumladan, tug‘ish yoshidagi ayollar soni esa muttasil o‘sib bormoqda (170 ming nafar). O‘tgan yilda shaharda umumiy tug‘uruqlar soni 20 mingdan ortiqni tashkil etgan bo‘lsa, 2023-yilning 6 oyida salkam 12 mingtaga yetgan. Bular orasida erta tug‘uruqlar ham bor (2022-yilda – 1 300 ta, 2023-yil 6 oyida – 539 ta).
Aynan erta tug‘uruqlar sonining ko‘pligi, qolaversa, shahar bolalar shifoxonasidagi neonotologiya (kam vaznli chaqaloqlarni parvarish qilish) bo‘limi ortiqcha yuklama bilan ishlayotgani sababli shahar tug‘uruq kompleksi negizida alohida perinatal markaz tashkil etish taklifi bildirilgan.
“Fikrimizcha, Sog‘liqni saqlash vazirligi mazkur masalani atroflicha o‘rganib, xulosa berishi zarur. To‘g‘ri, shahar hududida viloyat perinatal markazi ham joylashgan. Lekin sig‘im jihatdan bugungi talabga javob beradimi, degan savol tug‘iladi.
Yuqorida aytganimdek, ehtiyoj yildan yilga o‘sib bormoqda. Aniq, obyektiv holatni to‘liq ochib beradigan xulosa kerak”, — dedi Senat raisi.
“Mana shunday perinatal markazlarini tashkil qilish masalalarining ahamiyati asoratli tug‘uruqlar va nogironlikning oldini olishda nihoyatda katta. Aynan mana shu masala davlatimizda katta ustuvor vazifa etib belgilangan. Shuning uchun perinatal markazlarini eʼtibordan chetda qoldirish mumkin emas”, — deydi Tanzila Norboyeva.
Uning bildirishicha, ushbu obyektni 2024-yildagi O‘zbekistonning ijtimoiy va ishlab chiqarish infratuzilmasini rivojlantirish dasturiga kiritish masalasining Sog‘liqni saqlash hamda Iqtisodiyot va moliya vazirliklari tomonidan ijobiy hal etilishi maqsadga muvofiq.
Izoh (0)