Biz reklamaga har qadamda: televideniyeda, radioda, ko‘chada va ijtimoiy tarmoqlarda duch kelamiz. Ba’zida u g‘ashga tegadi, ko‘pincha esa kerakli tovar yoki xizmatni topishda yordam beradi. Yaxshi reklama — bu nima? 25-avgust — Reklama xodimlari kuni arafasida biz shu savol bilan O‘zbekiston reklama bozori ekspertlariga murojaat qildik.
Diyor Mirzaahmedov, O‘zbekiston marketing uyushmasi boshqaruvi raisi: “Qisqacha bayram tarixi haqida. O‘tgan yilga qadar O‘zbekiston marketologlarida o‘z kasbiy bayramlari bo‘lmagandi. Marketing uyushmasining vazifalaridan biri professional hamjamiyatni shakllantirish va rivojlantirish, mutaxassislarni rag‘batlantirish va marketing har qanday biznes rivoji uchun muhimligidan kelib chiqib, marketolog kasbining obro‘sini oshirishdan iborat. O‘tgan yilda uyushma Reklama xodimlari kuni va O‘zbekiston marketologlari kunini nishonlash sanalarini tanlash masalasini muhokamaga olib chiqqandi.
Taklif etilgan ro‘yxatdan, hamkorlar, uyushma ekspertlari va barcha istovchilar ovoz berishi yakunlariga ko‘ra, Reklama xodimlari kunini har yili nishonlash uchun 25-avgust tanlandi.
Nega aynan shu kun? 1996-yil 25-avgustda, Mustaqillikning 5 yilligiga bag‘ishlab, O‘zbekistonda birinchi marta ijtimoiy reklamaning milliy sujetlari yaratilib, ko‘chalarga ilingandi. Mana shu sanani mahalliy tashqi reklama uchun boshlang‘ich nuqta deb sanash mumkin. Marketologlar kuni etib 19-aprel tanlandi, 2016-yil ushbu sanada Toshkentda birinchi ADWEEK marketing va reklama haftaligi boshlangandi.
Bu kunlar rasmiy dam olish kunlari bo‘lmasa-da, lekin marketing va reklama faoliyatiga bog‘liq barchada nafaqat hamkasblarga, balki o‘z mijozlari va hamkorlariga ham minnatdorlik bildirishning ajoyib imkoniyati yaratiladi”.
Shohruh Shorahmetov, O‘zbekiston Respublikasi Raqobatni rivojlantirish va iste’molchilar huquqlarini himoya qilish qo‘mitasi raisi: “O‘zbekiston Respublikasi Raqobatni rivojlantirish va iste’molchilar huquqlarini himoya qilish qo‘mitasi reklama aylanmasi sohasidagi vakolatli davlat organi sanaladi. Qo‘mita vazifalari sirasiga fuqarolik jamiyati institutlari bilan birgalikda O‘zbekiston Respublikasida halol raqobat va qonunga rioya etish tamoyillariga asoslangan reklama bozori rivojlanishi uchun qulay sharoitlar yaratishga ko‘maklashish kiradi. O‘zbekiston reklama xodimlari kuni — reklama yaratish va joylash jarayonida qatnashuvchi barcha: turli reklamalar tayyorlovchi reklama agentliklari, reklama beruvchilar, menejerlar bayramidir.
Biz Marketing uyushmasining ushbu kasb bayramini belgilash bo‘yicha tashabbusini qo‘llab-quvvatladik va ma’qulladik. Raqobat kuchayishi sharoitida biznes uchun reklama ahamiyati ortadi. Endi o‘z tovari yoki xizmati haqidagi axborotni iste’molchiga shunchaki yetkazishning o‘zi yetarli emas, reklama xabari hissiyot uyg‘otishi va yodda qolishi muhim.
O‘zbekiston reklama tarmog‘i jadal rivojlanmoqda va hozirning o‘zida o‘nlab yo‘nalishni qamrab oladi, ularda butun mamlakat bo‘ylab yuz minglab mutaxassislar ishlamoqda. 25-avgust o‘z hamkasblari va hamkorlarini tabriklash imkonini beruvchi sanaga aylandi. Yaqin orada yaxshi an’ana: o‘z kasbiy bayramini reklama sohasida qiziqarli ijodiy loyihalar va maxsus tadbirlar bilan nishonlash urf bo‘ladi, deb umid qilaman”.
Kamilla Muminova, TBC BANK marketing boshlig‘i, TAF!23 Toshkent reklama festivali ekspertlar hay’atining a’zosi: “Nima u — yaxshi reklama? Yaxshi reklama — bu yaxshi natija beradigan reklamadir. Yaxshi reklamani aniqlash mumkin bo‘lgan bir nechta tamoyillar bor: birinchisi — yaxshi auditoriya. Reklama maqsadli auditoriya uchun yaxshi tanlangan bo‘lishi, o‘z maqsadli auditoriyasi uchun relevant, jozibali bo‘lishi kerak. Ikkinchisi — samaradorlik. Ushbu reklama bo‘yicha kompaniya Top of Mind’ini ko‘tarish mumkin, sotuvlar o‘sishi tezlashadi va bularning barchasi biznesga juda ijobiy ta’sir ko‘rsatadi. Uchinchisi — kreativ. Konsepsiya qanchalik kreativ va ijodiy boy yaratilsa, sizning maqsadli auditoriyangiz uchun shunchalik qiziqarli bo‘ladi. To‘rtinchisi — to‘g‘ri tanlangan media-kanallar. Ammo, sodda tilda aytilsa, yaxshi reklama — bu o‘chirib qo‘ygingiz kelmaydigan, qalbingizda saqlanib qoladigan va do‘stlaringizga aytib bergingiz keladigan reklamadir”.
Dodo Pizza Tashkent xalqaro pitsseriya tarmog‘ining direktori Akmal Raimov yaxshi reklama nima ekani haqida o‘z fikrini baham ko‘rdi: “Reklama hissiyotlarni uyg‘otishi kerak, qizig‘i — qandayligi muhim emas. Shunda reklamangiz oson esda qoladi. Agar reklamani eslab qolishsa, demak u haqda do‘stlariga va sizning bo‘lajak, potensial mijozlaringizga so‘zlab berishadi. Har qanday reklama tadbiri raqobat afzalligini aniq ko‘rsatib berishi kerak. Aks holda mijoz sizning mahsulotingiz yoki xizmatingiz nimasi bilan raqobatchilaringizning mahsulotlaridan yaxshiroq ekanini tushunmay, ular uchun pirovard foyda nimada ekanini anglamay qoladilar. Reklama tadbirining natijalari o‘lchab bo‘ladigan bo‘lishi kerak. Agar natijalarni o‘lchash mumkin bo‘lsa, demak ularni yaxshilash mumkin. Ularni cheksiz yaxshilang!”
Yaxshi reklamaning uchta mezoni haqida Prospect Media Agency direktori, TAF!23 Toshkent reklama festivali ekspert hay’atining katta hakami Botir Latipov so‘zlab berdi: “Mening fikrim quyidagicha: shartlardan biri bajarilsa, biz reklama yaxshi, deb ta’kidlay olamiz.
- Reklama ham buyurtmachiga, ham iste’molchiga yoqadi.
- Reklama oldiga qo‘yilgan vazifani bajaradi.
- Reklama mutaxassislar tomonidan yuqori baholanadi.
Zamonaviy reklama xaridorlarni yangi mahsulotlar va xizmatlar, maxsus takliflar to‘g‘risida xabardor qilishning samarali usullarini izlaydi. Bularning bari umumlashib, investitsiyalar jalb qilishga, tovarlar sifatining oshishiga va iste’mol tanlovi imkoniyatlarining uzluksiz kengayishiga xizmat qiladi”.
Fursatdan foydalanib, mamlakatimizda reklama rivojlanishiga aloqador barchani kasb bayrami bilan tabriklaymiz!
Izoh (0)