Misr qirg‘oqlarida britaniyalik sayyohlar bo‘lgan yaxta yonib ketdi (video)

Misr qirg‘oqlari yaqinidagi Qizil dengizda Hurricane sayyohlik yaxtasi yonib ketdi. Bu haqda The Guardian xabar berdi.

Sayohatga besh kun avval jo‘nab ketgan bortda 15 nafar britaniyalik sayyoh bo‘lgan. 11-iyun, yakshanba kuni sodir bo‘lgan yong‘indan keyin uch kishi bedarak yo‘qolgan. Rasmiy maʼlumotlarga ko‘ra, misrlik qutqaruvchilar yonayotgan kemadan 12 nafar sayyoh va shuncha miqdorda ekipaj aʼzolarini qutqarishgan.

Maxsus razvedka guruhi bedarak yo‘qolgan uch sayyohni qidirish uchun dengizga chiqqan. Yaxtadagi yong‘inga qisqa tutashuv sabab bo‘lgani aytilmoqda. Guvohlarning so‘zlariga ko‘ra, kemadagi yong‘in qirg‘oqdan to‘qqiz kilometr uzoqlikda bo‘lganida boshlangan.

Britaniya Tashqi ishlar vazirligi Misr kurortida uch kishining g‘oyib bo‘lganini tasdiqladi va rasmiylari bilan doimiy aloqada ekanini bildirdi.