Qozog‘iston prezidenti Qosim-Jo‘mart To‘qayev Abay viloyatidagi qo‘riqxonada yuz bergan keng ko‘lamli yong‘in oqibatida halok bo‘lgan o‘rmon xo‘jaligi xodimlarining oila a’zolari va yaqinlaridan kechirim so‘radi. Bu haqda Tengrinews xabar berdi.
To‘qayev 11-iyun kuni vertolyotda Abay viloyatidagi yong‘inlardan zarar ko‘rgan hududlar bo‘ylab uchib o‘tdi va yong‘in oqibatida jabrlanganlar bilan uchrashdi.
“Men bu yerga maxsus hamdardlik bildirish uchun keldim. Bu, birinchidan. Ikkinchidan, barcha mumkin bo‘lgan yordam ko‘rsatilishini xoh u moddiy yordam bo‘lsin, xoh boshqa yo‘l bilan shaxsan maʼlum qilish uchun.
Jumladan, bolalarni bog‘chalarga, oliy o‘quv yurtlariga joylashtirish va shu kabi barcha zarur narsalar. Har qanday yordam ko‘rsatiladi. Albatta, sizlar bilanman, siz mamlakatimiz fuqarolarisiz.
Men sizlar uchun javobgarman. Yurtboshi sifatida bo‘lib o‘tgan voqea uchun uzr so‘rayman. Bu juda og‘ir ekanini tushunaman. Siz boquvchingizdan, otangizdan, eng yaqin qarindoshlaringizdan ayrildingiz.
Lekin, afsuski, bu hayotda bunday holatlar bo‘lib turadi. Bularning barchasini oqlab bo‘lmaydi, yana bir bor takror aytaman, sizga ham ma’naviy, ham moddiy yordam ko‘rsatiladi”, — dedi u.
Abay viloyatida 8-iyun kuni boshlangan o‘rmon yong‘ini oqibatida 14 kishi halok bo‘ldi. Viloyatdagi ayrim aholi Semeydagi 800 kishini sig‘dira oladigan 9 ta evakuatsiya punktiga joylashtirilgandi.
Izoh (0)