Миср қирғоқлари яқинидаги Қизил денгизда Hurricane сайёҳлик яхтаси ёниб кетди. Бу ҳақда The Guardian хабар берди.
Саёҳатга беш кун аввал жўнаб кетган бортда 15 нафар британиялик сайёҳ бўлган. 11 июнь, якшанба куни содир бўлган ёнғиндан кейин уч киши бедарак йўқолган. Расмий маълумотларга кўра, мисрлик қутқарувчилар ёнаётган кемадан 12 нафар сайёҳ ва шунча миқдорда экипаж аъзоларини қутқаришган.
Махсус разведка гуруҳи бедарак йўқолган уч сайёҳни қидириш учун денгизга чиққан. Яхтадаги ёнғинга қисқа туташув сабаб бўлгани айтилмоқда. Гувоҳларнинг сўзларига кўра, кемадаги ёнғин қирғоқдан тўққиз километр узоқликда бўлганида бошланган.
Британия Ташқи ишлар вазирлиги Миср курортида уч кишининг ғойиб бўлганини тасдиқлади ва расмийлари билан доимий алоқада эканини билдирди.
Изоҳ (0)