Kaxovka GESning vayron bo‘lishi sababli 700 ming aholi ichimlik suvi tanqisligiga duch kelishi mumkin.
Shuningdek, GESning buzilishi Ukrainadan oziq-ovqat eksportining kamayishiga va butun dunyo bo‘ylab oziq-ovqat narxining oshishiga olib keladi. Bu haqda Birlashgan Millatlar Tashkiloti bosh kotibining gumanitar masalalar bo‘yicha o‘rinbosari Martin Griffits ma’lum qildi.
Uning so‘zlariga ko‘ra, KaxovkaGES vayron bo‘lgach, Ukrainadagi gumanitar vaziyat keskin yomonlashgan. “Biz bu halokatning to‘liq oqibatlarini endigina ko‘rishni boshlayapmiz”, — dedi Griffits.
Martin Griffitsning qo‘shimcha qilishicha, BMT GES vayron bo‘lganidan keyin suv toshqini zonasida qolgan Ukraina nazoratidagi viloyatlarning 30 mingga yaqin aholisiga yordam ko‘rsatgan. Shuningdek, u Rossiyaning BMTdagi doimiy vakili Vasiliy Nebenzya bilan jabrlanganlarga yordam ko‘rsatish uchun Rossiya nazoratidagi hududlarga BMT xodimlarini qabul qilish masalasini muhokama qilish uchun uchrashuv o‘tkazilishini e’lon qildi.
“Ammo buning ortida 700 000 kishi uchun sifatli ichimlik suvi yetishmasligi kabi katta muammo turibdi”, — dedi Griffits. Uning so‘zlariga ko‘ra, bu Rossiya va Ukraina nazoratidagi hududlarda suv tanqisligiga duch kelishi mumkin bo‘lgan aholining umumiy soni.
Izoh (0)