Rossiyalik harbiylar Ukraina armiyasining Xerson viloyatiga hujum qilishi ehtimolini istisno qilish maqsadida Kaxovka GES to‘g‘onini “portlatgan”. Bu haqda Ukraina mudofaa vaziri o‘rinbosari Anna Malyar ma’lum qildi.
“Kaxovka GESning portlatilishi, shubhasiz, Ukraina mudofaa kuchlarining Xerson yo‘nalishidagi hujumining oldini olish, Zaporojye va Baxmut yo‘nalishlariga o‘tkazishga mo‘ljallangan zarur zaxiralarni bo‘shatish uchun amalga oshirilgan”, — deydi u.
Malyarning so‘zlariga ko‘ra, rus armiyasining eng jangovar bo‘linmalarini Xerson viloyatidan ko‘chirish allaqachon boshlangan. Birinchi navbatda, dengiz piyodalari va havo-desant qo‘shinlari bo‘linmalari ko‘chirilmoqda.
Rossiya rasmiylari hozircha Malyarning bayonotiga izoh bermagan.
Rossiya versiyasi
Rossiya rasmiylarining ta’kidlashicha, Kaxovka GES to‘g‘onining vayron bo‘lishi Ukraina Qurolli kuchlarining stansiyaga qilingan hujumlari bilan bog‘liq. Kiyev maʼlumotlariga ko‘ra, Rossiya harbiylari to‘g‘onni ichkaridan portlatgan. Kaxovka suv omboridagi suv sathining yuqoriligi va urush paytida ko‘rilgan zarar tufayli to‘g‘on o‘z-o‘zidan qulashi mumkin degan versiya ham mavjud.
Shunga qaramay, seysmik hodisalarni o'rganish bilan shug'ullanuvchi NORSAR tadqiqot tashkiloti mutaxassislari to‘g‘on qulagan kuni stansiya yaqinida portlash sodir bo‘lganini ko‘rsatadigan signallarni qayd etdi. Bundan tashqari, Jo Bayden ma’muriyatidagi New York Times manbasining aytishicha, amerikalik josus sun’iy yo‘ldoshlar to‘g‘on vayron bo‘lishidan oldin portlash sodir bo‘lganini aniqlagan.
Izoh (0)