Prezident O‘zbekistonda agrar forum o‘tkazishni taklif qildi

Shavkat Mirziyoyev 25-may kuni Oliy Yevrosiyo iqtisodiy kengashining o‘ttizinchi yig‘ilishida videoaloqa orqali ishtirok etdi.

Prezident nutqi davomida Rossiyaning Yevrosiyo iqtisodiy ittifoqiga samarali raisligi mamlakatlar o‘rtasidagi ko‘p qirrali sheriklikning yangi yo‘nalishlarini ilgari surishga xizmat qilishini ta’kidladi.

“Oziq-ovqat xavfsizligi sohasida hamkorlikni kengaytirish muhim deb hisoblaymiz. Shu nuqtayi nazardan qishloq xo‘jaligi va oziq-ovqat tovarlari importi o‘rnini davlatlarimizda ishlab chiqarilayotgan mahsulotlar bilan faol egallashni rag‘batlantirish, yashil yo‘laklar, shu jumladan, “Yevrosiyo agroekspressi”ning to‘laqonli faoliyatini ta’minlash, ilmiy-amaliy tadqiqotlarni birgalikda olib borish va innovatsiyalarni joriy etishni qo‘llab-quvvatlash, mamlakatlarimiz agrobiznes vakillari kooperatsiya aloqalarini rivojlantirishni rag‘batlantirish va faoliyatini har tomonlama qo‘llab-quvvatlash muhimdir.

Ushbu maqsadlarda shu yilning oktabr oyida O‘zbekistonda qishloq xo‘jaligi vazirlari, yetakchi ishlab chiqaruvchilar va oziq-ovqat mahsulotlari import qiluvchilar ishtirokida “YOII plyus” formatida agrar forum o‘tkazishni taklif etamiz. Oltinchidan. O‘zbekiston yuqori malakali mutaxassislarni tayyorlashda yanada keng hamkorlik qilish, oliy o‘quv yurtlari va professional ta’lim markazlari o‘rtasida sheriklik munosabatlarini yo‘lga qo‘yish, ilmiy tadqiqotlarni qo‘llab-quvvatlash bo‘yicha qo‘shma loyihalarda ishtirok etishdan ham manfaatdordir. Muhandislik-texnik ixtisosliklar bo‘yicha talab yuqori bo‘lgan kadrlarni birgalikda tayyorlash yuzasidan “yo‘l xaritasi”ni ishlab chiqish zarur, deb hisoblaymiz”, — deb ta’kidladi davlat rahbari nutqi davomida.