Vayner Farhod Mannopov vafot etgan klinika yana ish faoliyatini boshlagani yuzasidan ma’lumot berildi

Farhod Mannopov vafoti ortidan “Star Med” klinikasi ham vaqtincha yopilgani ma’lum qilingan edi. Ijtimoiy tarmoqlarda mazkur klinikaning taniqli san’atkorlar tomonidan reklama qilinayotgani aks etgan video tarqaldi. Bosh prokuratura matbuot xizmati mazkur holat yuzasidan ma’lumot berdi. 

Sog‘liqni saqlash vazirligi tomonidan “Omad plyus” MCHJga qarashli “Star Med Center” klinikasiga tibbiy faoliyatni amalga oshirish uchun berilgan litsenziyani bekor qilish to‘g‘risida sudga ariza kiritilgan. Bosh prokuraturaning ma’lum qilishicha, hozirda mazkur ariza sud tomonidan ko‘rib chiqilmoqda.

Mazkur klinika Vazirlar Mahkamasining 2022-yil 21-fevraldagi 80-son qarori bilan tasdiqlangan “Maxsus elektron tizim orqali ayrim faoliyat turlarini litsenziyalash tartibi to‘g‘risida yagona nizom”ning 40-bandiga asoslanib, SSVning 11-martdagi qarori bilan litsenziya talablari va shartlari buzilgani hamda kelgusida salbiy oqibatlar kelib chiqishining oldini olish maqsadida vaqtincha to‘xtatilgan edi. 

“Mitti vayn” taxallusi bilan tanilgan 27 yoshli vayner Farhod Mannopov 5-mart kuni Toshkentning Chilonzor tumanida joylashgan klinikalardan birida vafot etdi. Ijtimoiy tarmoqlarda Farhod Mannopovning o‘limiga narkozni ko‘p berib yuborish sabab bo‘lgani haqida xabarlar tarqalgandi. Bosh prokuratura blogerning vafoti yuzasidan jinoyat ishi qo‘zg‘atilgani, ish doirasida shifokorlar ushlangani yoki qamoqqa olingani haqida tarqalayotgan xabarlar asossiz va haqiqatga to‘g‘ri kelmasligini ma’lum qilgandi.