Senat raisi Tanzila Norboyeva O‘zbekistonga rasmiy tashrif bilan kelgan Singapur prezidenti Halima Yaqub bilan uchrashdi. Bu haqda parlament yuqori palatasi rahbari Telegram’dagi kanalida ma’lum qildi.
“Suhbatimiz davomida O‘zbekiston va Singapur o‘zaro munosabatlarini rivojlantirishda parlamentlararo aloqalarning konstruktiv ahamiyatiga to‘xtaldik. Аlbatta, parlamentlarimiz o‘rtasidagi hamkorlik guruhlari faoliyatiga yangi impuls berish zarur”, — deb yozadi Tanzila Norboyeva.
Senat raisining so‘zlariga ko‘ra, muloqotda Halima Yaqub o‘zbek xalqining madaniyati va sanʼatiga doir xalqaro ko‘rgazmalar o‘tkazish kerakligini aytgan.
“Halima Yaqub xonim o‘zbek xalqining madaniyati va sanʼatiga oid ko‘rgazmalar va art-loyihalar nafaqat Yevropa davlatlarida, balki Osiyo mamlakatlarida, xususan, Singapurda ham namoyish qilinishi kerakligini alohida taʼkidladi. Zero, Singapur va O‘zbekiston xalqlarining maʼnan yaqin urf-odatlari, qadriyatlari va oilaviy anʼanalari barobarida millatlararo hamda konfessiyalararo tinchlik totuvlikni taʼminlashdagi sa’y-harakatlari ham mushtarakdir. Singapur va Oʼzbekistonning turli yoʼnalishlarda, jumladan, savdo-iqtisodiy, innovatsiya, fan va taʼlim sohalarida hamkorlikni kuchaytirish borasida yakdil boʼldik. Xususan, taʼlimning deyarli barcha darajalarida oʼzaro amaliy muloqot qilish borasida fikrlashdik. Davlat xizmatchilarining kasbiy va boshqaruv salohiyatini oshirishda Singapurning ilgʼor tajribasini oʼrganish nihoyatda muhim” — deb yozadi Tanzila Norboyeva.
Izoh (0)