Xorazmda o‘z onasini do‘pposlab o‘ldirgan yigitga hukm o‘qildi

Xorazm viloyati Tuproqqal’a tumanida o‘z onasini do‘pposlab o‘ldirgan o‘g‘ilga sud hukmi o‘qildi. Bu haqda viloyat IIB axborot xizmati xabar berdi. 

Unga ko‘ra, mazkur tumanda yashaydigan yigit ichkilik oqibatida uyiga kelib onasi bilan janjallashgan. Janjal vaqtida onasining turli gaplaridan g‘azablangan yigit uni do‘pposlay boshlagan. Ayol qochishga uringan vaqtida o‘g‘li yana uni sudragan va urishda davom etgan. 

Shundan so‘ng o‘g‘il xonasiga kirib ketgan. Ayol ham yarador holida xonasiga kirib, hushini yo‘qotgan. Tong vaqtida o‘g‘il onasining oldiga kirganida onasi qimirlamay yotganini ko‘rgan, lekin yana yotog‘iga kirib uxlashda davom etgan. Ayolning uyiga kelgan ukasi uning o‘lib yotganiga guvoh bo‘lgan. Tez yordam xodimlari yetib kelgach, ayolning 3-4 soat avval joni uzilgani ma’lum bo‘lgan. 

Jinoyat ishlari bo‘yicha Bog‘ot tuman sudi uning mastlik holatida odam o‘ldirish bilan bog‘liq jinoyatni sodir qilganini og‘irlashtiruvchi holat deb baholab, uning aybiga to‘liq iqrorligini, muqaddam sudlanmaganini, jabrlanuvchining qonuniy vakili tomonidan da’vo yo‘qligini va ishdagi boshqa holatlarni e’tiborga olib, uni 8 yil muddatga ozodlikdan mahrum qildi.