“Sinfdoshlar ‘gapi’da qatnasholmasam-da, to‘y-maʼrakalarda doim birgamiz”. Namangan hokimi sinfdoshlari bilan “So‘nggi qo‘ng‘iroq” tadbirida ishtirok etdi

Namangan viloyati hokimi Shavkat Abdurazzoqov sinfdoshlari hamrohligida o‘zi tahsil olgan Namangan shahridagi 2-umumtaʼlim maktabida o‘tkazilgan “So‘nggi qo‘ng‘iroq” tadbirida ishtirok etdi. Bu haqda “Daryo” muxbiri xabar berdi.

Viloyat rahbari maktab bitiruvchilariga prezident tabrigini o‘qib eshittirdi. O‘qish davomida muvaffaqiyatlarga erishgan o‘quvchilar va ularning ota-onalariga tashakkurnoma hamda esdalik sovg‘alari topshirdi. Bitiruvchilarga kitoblar to‘plamlari taqdim etildi.

“Daryo” muxbiri Azizbek Abduvaliyev tadbir davomida Namangan viloyati hokimidan intervyu oldi.

“O‘qishni tamomlaganimizga bugun roppa-rosa 30 yil to‘ldi. U paytlar viloyatda bor-yo‘g‘i 3 ta oliy taʼlim muassasasi bor edi, shu sababli bitiruvchilarning o‘qishga kirish imkoniyati ham past bo‘lgan. Bugungi kunga kelib ularning soni 10 taga yetdi, shunga yarasha institut va universitetlarda o‘qiyotgan yoshlarimiz qamrovi ham kengaydi”, — deydi Shavkat Abdurazzoqov.

Hokimning aytishicha, vaqt tig‘izligi sababli sinfdoshlar gap-gashtagiga borishga fursat topolmaydi, lekin ularning issiq-sovuq maʼrakalaridan qolmaslikka harakat qiladi.

“Bitiruvchilarga aytiladigan gap shuki, ular o‘zining ustida ishlashi va qiyinchiliklardan qo‘rqmasligi zarur. Asosiysi, ota-onaning hurmatini joyiga qo‘yish kerak. Shunda hammasi yaxshi bo‘ladi”, — deydi Shavkat Abdurazzoqov.

“So‘nggi qo‘ng‘iroq” tadbiri yakuniga yetganidan so‘ng Namangan viloyati hokimi xizmat mashinasiga taʼlim bergan ustozlarini o‘tqazdi, o‘zi esa sinfdoshlari bilan mikroavtobusda keyingi manzilga yo‘l oldi.