O‘zbekistonda 2023-yil akademik litseylarning 3 ming nafardan ortiq bitiruvchisi chet tilidan milliy sertifikat oldi. Bu haqda Oliy ta’lim, fan va innovatsiyalar vazirligi axborot xizmati xabar berdi.
Bilim va malakalarni baholash agentligi tomonidan may oyida chet tilini bilish darajasini aniqlash bo‘yicha o‘tkazilgan test imtihonlari natijasiga ko‘ra, akademik litseylarning 3 248 nafar 2-bosqich o‘quvchisi B, C1 darajadagi xorijiy tillar bo‘yicha milliy sertifikatga ega bo‘ldi.
Jumladan, o‘quvchilarning 1 579 nafari B1, 1 504 nafari B2, 165 nafari C1 darajali milliy sertifikat olishdi. Ushbu ko‘rsatkich 2020/2021-o‘quv yiliga nisbatan besh barobar, 2021/2022-o‘quv yiliga nisbatan esa ikki barobardan ko‘proq nisbatga ortgan.
Ma’lumot uchun, B2 va undan yuqori darajadagi milliy yoki xorijiy sertifikatga ega bo‘lgan abituriyentlarga ta’limning keyingi bosqichida, ya’ni oliy ta’lim muassasalariga o‘qishga kirishda mos fandan imtihonlarsiz belgilangan maksimal ball beriladi.
Izoh (0)