Qashqadaryo viloyatining Shahrisabz shahrida Yoshlar ittifoqining 300 nafar sardori jam bo‘lib, o‘quv seminari tashkil qildi. Bu haqda “Daryo”ga Yoshlar ittifoqi Qashqadaryo viloyati kengashi masʼullari xabar berdi.
.jpg)
Taʼkidlanishicha, 19—24-may kunlari viloyatdagi “Lochin” oromgohida O‘zbekiston yoshlar ittifoqi “Kamalak” bolalar tashkilotining navbatdagi 22-anjumani tashkil etilgan.
“Respublikaning barcha hududlaridan kelgan 300 nafar sardorlar Qarshida tantanali kutib olinib, Shahrisabz shahridagi Oqsaroy majmuasidagi Amir Temur haykali poyiga gul qo‘yish marosimida ishtirok etdi. Shundan so‘ng ‘Lochin’ bolalar oromgohiga borilib, anjuman ochilishiga bag‘ishlangan konsert dasturida ishtirok etdi”, — deydi Yoshlar ittifoqi Qashqadaryo viloyati Kengashi raisi Abror Ahmedov.
.jpg)
Qo‘shimcha qilinishicha, anjuman doirasida o‘quv seminarlar, “Eng namunali hududiy sardorlar kengashi”, “Quvnoqlar va zukkolar” tanlovi, “Munozara” va “Zakovat” intellektual o‘yini, “Qadriyat, urf-odat, anʼana va bolalar”, “Xalqlar do‘stligi” festivallari o‘tkazilgan. “Olimpiya kuni” “So‘nggi qo‘ng‘iroq” “Do‘stimga sovg‘a” loyihalari hamda “Plogging” ekologik aksiyasi orqali eng zo‘rlar aniqlangan.
“Besh kun davom etgan sardorlar anjumanida ishtirokchilar o‘zaro musobaqa va tanlovlarda bellashishdi, faxrli o‘rinlarni egallagan jamoalar O‘zbekiston yoshlar ittifoqi ‘Kamalak’ bolalar tashkiloti hamda viloyat maʼsullari tomonidan diplom hamda estalik sovg‘alari bilan taqdirlandi”, — deydi masʼul.
Yoshlar ittifoqi Qashqadaryo viloyati Kengashi raisi Abror Ahmedovning maʼlumot berishicha, respublikada ayni kunda 317 ming 653 nafar Sardorlar Kengashi aʼzosi bor. Shundan 170 ming 499 nafari sinflarda, 144 ming 46 nafari maktablarda, 2 ming 912 nafari tuman va shaharlarda, 198 nafari hududlarda hamda 14 nafari respublikada faoliyat olib boradi.
.jpg)
Tadbir so‘ngida katta gulxan yoqilib, xushovoz xonandalar ishtirokida galakonsert tashkil etildi. Anjuman mushakbozlik bilan yakunlangan.
Izoh (0)