Jurnalist va blogerlarning huquqiy savodxonligini oshirishga mo‘ljallangan loyiha taqdimoti o‘tkazildi

Milliy mass-mediani qo‘llab-quvvatlash va rivojlantirish jamoat fondi hamda Shveysariya taraqqiyot va hamkorlik agentligi SDC hamkorligida amalga oshirilgan “Jurnalist va blogerlarning huquqiy savodxonligini oshirish uchun mass-media sohasiga oid 100 ta dolzarb savollarga javoblar” loyihasi taqdimoti o‘tkazildi.

So‘nggi yillarda O‘zbekistonda so‘z va axborot erkinligini ta’minlash, shuningdek, ommaviy axborot vositalarini rivojlantirish faoliyatining huquqiy asoslarini takomillashtirish, jurnalistlarning kasbiy huquqlarini himoya qilishga qaratilgan qonunchilik bazasi yaratildi. Xususan, ushbu sohani yoki uning alohida qismlarini tartibga soluvchi 20 dan ortiq qonun hujjatlari qabul qilingan.

Ammo mazkur hujjatlarning mohiyati va mazmuni bo‘yicha tushuntirish ishlari har doim ham tizimli ravishda olib borilmaydi. Bu yo‘nalishda o‘tkazilayotgan tadbirlar ko‘p hollarda bir martalik xarakterga ega bo‘lib, ishtirokchilar soni cheklangan hisoblandi. 

Shu bilan birga, nodavlat ommaviy axborot vositalari sonining yil sayin ortib borishi kuzatilmoqda. Shu jihatdan jurnalistlarning huquqiy savodxonligini oshirish alohida ahamiyat kasb etadi. Mazkur loyiha barcha jurnalist va blogerlar hamda yangi OAVni ro‘yxatdan o‘tkazmoqchi bo‘lganlar uchun mo‘ljallangan.

Loyiha doirasida jurnalist va blogerlardan yuzdan ortiq savollar kelib tushdi. To‘plangan barcha savollar “Legalmax” yuridik firmasi huquqshunoslari tomonidan umumlashtirilib, tizimlashtirildi hamda ularni o‘rganib chiqib, savollardan 100 tasiga atroflicha javob berildi. Javoblar sifatli va qisqa videoroliklar shaklida tayyorlandi.

Ma’lumotlarni izlash qulay bo‘lishi uchun barcha javoblar ommaviy axborot vositalari faoliyati, OAV faoliyatidagi cheklovlar, axborot olish kafolatlari, shaxsiy ma’lumotlardan foydalanish tartibi, mualliflik huquqi va boshqalarni o‘z ichiga olgan tematik bloklarga bo‘lingan.

Javoblar bilan Milliy mass-mediani qo‘llab-quvvatlash va rivojlantirish jamoat fondining veb-saytiga o‘zbek va rus tillarida joylashtirildi. Shuningdek, javoblar yozilgan video roliklar YouTube platformasiga joylashtirildi.

Bundan tashqari, yaqin kunlarda Milliy mass-mediani qo‘llab-quvvatlash va rivojlantirish jamoat fondi tomonidan Android va iOS tizimlari uchun mobil ilova va Telegram boti ishga tushiriladi.