Moskvada G‘alaba kuni munosabati bilan o‘tkaziladigan bayram tadbirlariga xorijdan yagona yetakchi — Qirg‘iziston rahbari Sadir Japarov tashrif buyurishi kutilmoqda. Bu haqda “Vedomosti” diplomatik manba va prezident ma’muriyatiga yaqin manbaga tayanib xabar berdi.
G‘alaba kuni uchun Japarovni Rossiyaga Kremldagi xalqaro munosabatlarni nazorat qiluvchi bosh vazir o‘rinbosari Aleksey Overchuk mart oyida taklif qilgan. “Biz, shubhasiz Qirg‘iziston ushbu g‘alabaga va Moskvani himoya qilishga qanday hissa qo‘shganini doim yodda tutamiz, bu biz uchun muqaddas burch”, — dedi Overchuk tashrif haqida e’lon qilar ekan.
“Vedomosti” manbalariga ko‘ra, 9-may atrofida bo‘lib o‘tadigan tashrif davomida Japarov nafaqat tantanali tadbirlarda qatnashishi, balki Rossiya rahbari Vladimir Putin bilan muzokaralar olib borish ham rejalashtirilgan.
2022-yilda G‘alaba kunini nishonlash uchun birorta ham xorijiy davlat rahbari Moskvaga kelmagan edi. Kreml buni chet el rahbarlarini taklif qilmagani bilan izohlagan. “Bu yubiley sanasi emas. Bu bizning bayramimiz, bu butun Rossiya uchun, barcha ruslar uchun muqaddas bayramdir”, — degan edi o‘sha paytda Rossiya prezidentining matbuot kotibi Dmitriy Peskov.
Rossiyaning bir qator hududlarida 2023-yil 9-may kuni “xavfsizlik nuqtayi nazaridan” G‘alaba kunida an’anaviy parad o‘tkazilmaydigan bo‘ldi. Moskvadagilar “O‘lmas polk” marshi ham o‘tkazmaydi.
2021-yilda G‘alaba paradiga xorijiy yetakchilardan faqat Tojikiston rahbari Emomali Rahmon tashrif buyurgandi. 2020-yilda esa qator davlatlar rahbarlari bilan birga O‘zbekiston prezidenti Shavkat Mirziyoyev ham Moskvadagi parad mehmoni bo‘lgan.
Izoh (0)