Polsha yaqin ikki yil ichida kuchli armiya yaratishni rejalashtirmoqda. Bu haqda Polsha bosh vaziri o‘rinbosari va mudofaa vaziri Mariush Blashak ma’lum qildi. Bunday va’da saylov kampaniyasi doirasida berildi — Polshada shu yilning kuzida parlament saylovlari bo‘lib o‘tadi.
Blashakning aytishicha, hukmron milliy-konservativ “Qonun va adolat” partiyasi g‘alaba qozonsa, “ikki yildan so‘ng Polsha armiyasi Yevropada quruqlikdagi eng kuchli armiyaga aylanadi”.
Varshavada konservatorlar boshchiligidagi hukumat Ukrainaning eng kuchli siyosiy va harbiy tarafdorlaridan biri hisoblanadi. Shu bilan birga, Polsha Rossiya hujumiga uchragan qo‘shni davlatni tanklar, MiG-29 qiruvchi samolyotlari va boshqa turdagi qurollar bilan ta’minlabgina qolmay, o‘z armiyasini ham faol ravishda qurollantirmoqda.
Avvalroq Polsha prezidenti Anjey Duda mamlakat Janubiy Koreyadan FA-50 va AQSHdan F-35 samolyotlarini olayotgani munosabati bilan o‘zining barcha MiG-29 qiruvchilarini Ukrainaga topshirishi haqida e’lon qilgandi.
Aprel boshida Duda Polsha allaqachon sakkizta MiG-29 qiruvchisini Kiyevga yetkazib berganini va shu turdagi oltita qiruvchini topshirishga tayyorlanayotganini aytgan.
Izoh (0)