Москвада Ғалаба куни муносабати билан ўтказиладиган байрам тадбирларига хориждан ягона етакчи — Қирғизистон раҳбари Садир Жапаров ташриф буюриши кутилмоқда. Бу ҳақда “Ведомости” дипломатик манба ва президент маъмуриятига яқин манбага таяниб хабар берди.
Ғалаба куни учун Жапаровни Россияга Кремлдаги халқаро муносабатларни назорат қилувчи бош вазир ўринбосари Алексей Оверчук март ойида таклиф қилган. “Биз, шубҳасиз Қирғизистон ушбу ғалабага ва Москвани ҳимоя қилишга қандай ҳисса қўшганини доим ёдда тутамиз, бу биз учун муқаддас бурч”, — деди Оверчук ташриф ҳақида эълон қилар экан.
“Ведомости” манбаларига кўра, 9 май атрофида бўлиб ўтадиган ташриф давомида Жапаров нафақат тантанали тадбирларда қатнашиши, балки Россия раҳбари Владимир Путин билан музокаралар олиб бориш ҳам режалаштирилган.
2022 йилда Ғалаба кунини нишонлаш учун бирорта ҳам хорижий давлат раҳбари Москвага келмаган эди. Кремль буни чет эл раҳбарларини таклиф қилмагани билан изоҳлаган. “Бу юбилей санаси эмас. Бу бизнинг байрамимиз, бу бутун Россия учун, барча руслар учун муқаддас байрамдир”, — деган эди ўша пайтда Россия президентининг матбуот котиби Дмитрий Песков.
Россиянинг бир қатор ҳудудларида 2023 йил 9 май куни “хавфсизлик нуқтаи назаридан” Ғалаба кунида анъанавий парад ўтказилмайдиган бўлди. Москвадагилар “Ўлмас полк” марши ҳам ўтказмайди.
2021 йилда Ғалаба парадига хорижий етакчилардан фақат Тожикистон раҳбари Эмомали Раҳмон ташриф буюрганди. 2020 йилда эса қатор давлатлар раҳбарлари билан бирга Ўзбекистон президенти Шавкат Мирзиёев ҳам Москвадаги парад меҳмони бўлган.
Изоҳ (0)