Argentinada chivin tashiydigan virusdan 40 dan ortiq odam vafot etdi

Argentinada denge isitmasiga chalingan 40 dan ortiq odam vafot etdi, 60 mingdan ortiq odam kasallikni yuqtirib olgan. Bu haqda BBC xabar berdi.

Ma’lum qilinishicha, infeksiya chivinlar orqali tarqaladi. Denge isitmasi odatda to‘satdan isitma, bosh og‘rig‘i, mialgiya, artralgiya va umumiy limfadenopatiyaga olib keladi, so‘ngra takror isitmadan keyin toshma paydo bo‘ladi. 

Bundan tashqari yo‘tal, tonzillit va rinoreya kabi nafas yo‘llarining infeksiyalari, qon ketishi va shokka sabab bo‘luvchi gemorragik isitmaning o‘g‘ir holatlari kuzatilishi mumkin. Tashxis serologik test va polimeraza zanjiri reaksiyasini o‘z ichiga oladi. Kasallikdan davolanish simptomatik va gemorragik isitma holatida transfuzion terapiyadan iborat.

Argentina Sog‘liqni saqlash vazirligi kasallikka chalinish holatlari barqarorlasha boshlaganini aytmoqda. Biologlar laboratoriyalarda minglab erkak chivinlarni nurlantirmoqda, bu ularning avlodlari kelajakda DNK shikastlanishi tufayli yashamasligiga olib keladi. Maqsad denge isitmasi tarqalishining oldini olish uchun radiatsiya ta’siriga uchragan chivinlarni dominant turga aylantirishdan iborat.

Argentinaning Chili va Boliviya bilan chegaralariga yaqin joylashgan shimoli-g‘arbiy Salta, Tukuman va Jujuy viloyatlarida eng ko‘p o‘lim holatlari qayd etilgan.

Argentina Sog‘liqni saqlash vazirligi odamlarni chivinlarga qarshi kurash choralarini kuchaytirishga, jumladan, eshik va derazalarga chivinga qarshi to‘rlardan, hasharotlarga qarshi vositalardan foydalanish va chivinlar ko‘payishi mumkin bo‘lgan har qanday suv idishlarini olib tashlashga chaqirgan.