Shavkat Mirziyoyev va O‘zbekiston harbiylari Moskvadagi G‘alaba paradida ishtirok etdi (foto)
O‘zbekiston Prezidenti Shavkat Mirziyoyev Ikkinchi jahon urushida qozonilgan g‘alabaning 75 yilligiga bag‘ishlangan paradda ishtirok etdi. Bu haqda Prezident matbuot xizmati xabar berdi.
Prezident matbuot xizmatining qayd etishicha, bu yil Rossiya poytaxti Moskva shahrida g‘alabaning 75 yilligiga bag‘ishlangan tantanali tadbir 9-may kuni o‘tkazilishi rejalashtirilgan edi. Ammo koronavirus pandemiyasi sababli uni tashkillashtirish keyingi muddatlarga surildi. 1945-yilda g‘alabaning birinchi markaziy paradi 24-iyun sanasida o‘tkazilgani bois 2020-yil ham bunday tantana uchun aynan shu kun tanlandi.
Masalan, so‘nggi paytlarda olib borilgan tadqiqotlar natijasida O‘zbekistondan 2 millionga yaqin kishi urushga safarbar etilgani aniqlandi. Front ortida ham o‘zbekistonliklar ko‘rsatgan matonat kelajak avlodlarga cheksiz faxr va iftixor bag‘ishlaydi.
Shu bois mamlakat vakillari g‘alabaning 75 yillik shonli sanasi munosabati bilan Moskva shahrida o‘tkaziladigan tantanaga taklif etildi”, — deyiladi xabarda.
Ta’kidlanishicha, pandemiya butun dunyoga o‘z ta’sirini ko‘rsatayotgan hozirgi og‘ir sharoitda O‘zbekiston Prezidentining bunday tadbirda ishtirok etishining o‘zi ajdodlarga xos qahramonlik ifodasidir. “Ekspertlar fikriga qaraganda, mustaqil O‘zbekiston Prezidentining ilk bor qatnashishi paradning nufuzini sezilarli darajada oshiradi”, — deyiladi Prezident matbuot xizmat xabarida.
Qayd etilishicha, O‘zbekiston harbiylari ham mazkur tadbirda mamlakat mustaqillikka erishganidan keyin birinchi bor ishtirok etdi.
“Mamlakatimiz rahbari Moskvaning Qizil maydonida bo‘lib o‘tgan tantanali tadbirda o‘z ishtiroki bilan O‘zbekiston elining shonli G‘alabaga erishishdagi umum e’tirof etilgan buyuk xizmatiga hurmat bajo keltirdi”, — deyiladi xabarda.
Ta’kidlanishicha, bo‘lib o‘tgan paradda 13 ta davlatdan 225 ta harbiy texnika, 14 ming askar va ofitser qatnashdi. Rossiya poytaxti osmonidan 55 samolyot va 20 ta vertolyot uchib o‘tdi.
Eslatib o‘tamiz, O‘zbekiston Prezidenti Shavkat Mirziyoyev mazkur paradda qatnashish uchun 23-iyun kuni Moskvaga yetib bordi. Shu kuni Shavkat Mirziyoyev Rossiya prezidenti Vladimir Putin bilan uchrashdi. Rossiya prezidenti G‘alaba paradiga kelgani uchun Shavkat Mirziyoyevga minnatdorchilik bildirdi.
Avvalroq mazkur paradda ishtirok etish uchun Moskvaga borgan Qirg‘iziston delegatsiyasi a’zolari orasida koronavirus aniqlangani haqida xabar berilgandi, Shu sababli, Qirg‘iziston prezidenti So‘ronboy Jeenbekov paradda ishtirok etmadi.
Ma’lumot uchun, Vladimir Putin Moskvada o‘tgan G‘alaba paradiga barcha MDH davlatlari rahbarlarini taklif qilgan. Ozarbayjon prezidenti Ilhom Aliyev, Armaniston bosh vaziri Nikol Pashinyan mamlakatlaridagi epidemiologik vaziyat tufayli, Turkmaniston prezident Gurbanguli Berdimuhamedov 29-iyunda 63 yosh — Payg‘ambar yoshiga to‘lishi sabab tantanali tadbirlarga bora olmasligini e’lon qilgan. Qozog‘istonning birinchi prezidenti Nursulton Nazarboyev esa koronavirus yuqtirib olgan va u ham Moskvaga bormagan.
