AQSH Rossiya tashqi ishlar vaziri Sergey Lavrovga Nyu-York safarida hamrohlik qiladigan rossiyalik ommaviy axborot vositalari xodimlariga viza bermadi. Bu haqda Rossiya TIV matbuot kotibi Mariya Zaxarova ma’lum qildi.
Zaxarova Lavrovning Rossiya delegatsiyasi AQSHga uchishidan oldin aeroportda yo‘llagan murojaatini e’lon qildi. Vazirning taʼkidlashicha, Amerika tomoni viza berishdan bosh tortib, “qo‘rqoqlik, ahmoqlik qildi va so‘z erkinligini himoya qilish borasidagi qasamyodlarining bahosi qancha ekanini ko‘rsatdi”.
“Eng muhimi, ishonchingiz komil bo‘lsin: biz buni unutmaymiz, kechirmaymiz”, — dedi Lavrov RT, “Izvestiya” va AQSH vizasi berilmagan boshqa OAV xodimlariga murojaat qilib.
Rossiya diplomatik manbasining Rossiya davlat OAVlariga aytishicha, amerikalik jurnalistlarga nisbatan munosabat ham “xuddi shunday” bo‘ladi, “amerikalik jurnalistlar barcha noqulayliklarni boshdan kechirishiga hech qanday shubha bo‘lmasligi kerak”.
Avvalroq jurnalistlardan tashqari Rossiya delegatsiyasining ayrim aʼzolariga ham vizalar berilmagani xabar qilingandi. Lavrovning o‘ziga ham uzoq vaqt viza berilmagan.
Aprel oyida Birlashgan Millatlar Tashkiloti Xavfsizlik kengashiga Rossiya raislik qilmoqda. Bunga Ukraina va Yevropa Ittifoqi qarshi chiqqan. Sergey Lavrov AQSHga tashrifi doirasida 24 va 25-aprel kunlari Xavfsizlik kengashi majlislarida ishtirok etadi.
Izoh (0)