Turkiya prezidenti Rajab Toyyib Erdo‘g‘on Turkiya Qurolli kuchlariga mamlakatda ishlab chiqarilgan yangi Altay (“Oltay”) tankini sinovdan o‘tkazish uchun topshirganini ma’lum qildi. Bu haqda mahalliy Yeni Şafak nashri yozmoqda. Tankni topshirish marosimi va Turkiya rahbarining chiqishi Sakariya viloyatidagi zavodda bo‘lib o‘tdi.
“Bizning yangi Altay tankimiz o‘n yil avval taqdim etilgan prototipdan butunlay farq qiladi va undan ustun imkoniyatlarga ega”, — dedi Erdo‘g‘on.
Uning so‘zlariga ko‘ra, tankning yangi versiyasida zirh dizayni yaxshilangan va Akkor faol himoya tizimi qo‘shilgan. Sinovlardan keyin tanklarni davomiy ishlab chiqarish boshlanishi rejalshtirilgan, deya qo‘shimcha qildi Turkiya prezidenti.
“Hozir Turkiya bu sohada (quruqlik vositalari ishlab chiqarishda) dunyoda birinchi o‘rinni egalladi va ko‘plab armiyalarga o‘z harbiy mahsulotlarini yetkazib beruvchi davlatga aylandi”, — dedi Erdo‘g‘on.
Altay tankining yangi versiyasini Turkiyaning BMC Defense kompaniyasi ishlab chiqardi. Kompaniya rahbariyatining ma’lum qilishicha, yangi modeldagi yaxshilanishlar so‘nggi yigirma yil davomida jangovar mashg‘ulotlardan olingan saboqlar asosida amalga oshirilgan.
Altay’ning yangi xususiyatlari orasida faol himoya tizimi, takomillashtirilgan zirh tizimi, yangilangan o‘t ochishni boshqarish tizimi, yangilangan tankni boshqarish tizimi, konsentrlangan kuchli tok uzatish qurilmasi va boshqalar mavjud. Ishlab chiqaruvchi kompaniya menejerining so‘zlariga ko‘ra, tank milliy Mudofaa vazirligi tomonidan maʼqullangan taqdirda, bir qancha ittifoqchi davlatlar uni sotib olishga qiziqish bildirgan.
Tankni sinovdan o‘tkazish 2024-yilda yakunlanishi rejalashtirilgan, 2026-yilning ikkinchi yarmida uni ommaviy ishlab chiqarish boshlanadi.
Avvalroq Turkiya o‘z harbiy-dengiz floti tarkibiga jangovar dronlarni tashishga mo‘ljallangan dunyodagi birinchi aviatashuvchi kema — “Anadolu” desant kemasini qabul qilgandi. U xususan, Bayraktar oilasiga mansub dronlarni olib yuradi.
Izoh (0)