Rossiyaparast ukrainalik siyosatchi Viktor Medvedchukning rafiqasi Oksana Marchenko Ukrainada qidiruvga berildi. Tegishli kartochka mamlakat Ichki ishlar vazirligi saytida e’lon qilingan.
Qidiruv kartochkasida aytilishicha, Marchenko 2023-yil 24-martdan beri dastlabki tergov organlaridan yashirinib yuribdi.
Marchenkoni qidiruvga berish tashabbusini Ukraina xavfsizlik xizmatining Ivano-Frankovsk viloyatidagi boshqarmasi ko‘rsatgan.
Oksana Marchenko — Medvedchukning uchinchi xotini. Ukrainada u Rossiya huquq-tartibot idoralarini moliyalashda gumon qilinmoqda. 2023-yil 23-fevralda sud uning 5,6 milliard grivnadan (taxminan 152 million dollar) ortiq bo‘lgan aktivlarini xatlovga oldi.
Meduza xabariga ko‘ra, Viktor Medvedchukning 19 yoshli qizi Darya kamida 2021-yildan beri Moskvada istiqomat qiladi. Oksana Marchenko u bilan birga yashayotgan bo‘lishi mumkin.
“Putinning qadrdoni” deb ataladigan Medvedchuk 2021-yilda Ukrainada davlatga xiyonatda ayblangan, 2022-yil sentabrda u mahbuslar almashinuvi doirasida Rossiyaga topshirilgan. 2023-yil fevral oyida “Birinchi kanal”ga bergan intervyusida Medvedchuk Moskvada “majburan” yashayotganini aytdi.
Izoh (0)