2022-yil sentabrda asirlar almashinuvi doirasida Rossiyaga topshirilgan ukrainalik siyosatchi Viktor Medvedchuk “Birinchi kanal”ga bergan intervyusida hozirda Moskvada yashayotganini aytdi.
“Ilgari Moskvaga turli ishlar bilan kelardim, bir kunlik bo‘lib, ertalab kelib, kechqurun ketardim. Endi esa doimiy ravishda Moskvada yashayapman, majburan. Men Ukrainani tark etmadim, meni almashishdi”, — dedi Medvedchuk.
Intervyuda siyosatchi 2021-yilda Ukrainada davlatga xiyonatda ayblanib hibsga olingan paytdagi holati haqida gapirdi. U o‘sha kunni “hayotimdagi eng og‘ir kun” deb atadi va o‘zining ta’qib qilinishini “oilasi uchun dahshatli qayg‘u” deb ta’rifladi. Shu bilan birga, Medvedchukning ta’kidlashicha, ukrainalik tergovchilar unga nisbatan jismoniy zo‘ravonlik qo‘llamagan, ammo psixologik “doimiy ravishda bosim o‘tkazilgan”.
Medvedchuk “Birinchi kanal”ga avvalroq kenja qizi Dariya bilan ko‘rishganini aytdi. OAV Medvedchukning qizi kamida 2021-yildan beri Moskvada yashayotgani va Oliy Iqtisodiyot maktabida tahsil olayotganini xabar bergan edi. Bundan tashqari qiz bilan onasi va Medvedchukning uchinchi rafiqasi Oksana Marchenko birga yashashi aytilgan.
Ma’lumot o‘rnida, “Putinning qadrdoni” deb ataladigan Viktor Medvedchukka 2021-yilda Ukraina huquq-tartibot idoralari davlatga xiyonat va “milliy boyliklarni talon-taroj qilishga urinish” bo‘yicha ikkita ayblov qo‘ydi. Medvedchuk uy qamog‘iga olingan, xabarlarga ko‘ra, u Rossiya Ukrainaga bostirib kirgan dastlabki kunlarda qochib ketgan. 12-aprel kuni Ukraina rasmiylari Medvedchuk hibsga olingani haqida ma’lum qildi.
21-sentabr kuni asirlar bilan ayirboshlashuv doirasida Kiyev Moskvaga siyosatchi Viktor Medvedchukni va 55 nafar rossiyalik harbiylarni topshirgandi.
Ayni paytda Ukrainada Oksana Marchenko Rossiya Milliy gvardiyasini moliyalashtirishda ayblanmoqda.
Izoh (0)